Викенд предлог: Пробајте ја највкусната пастрмајлија во Виница

Детали

четврток, 10 октомври 2019

Велат дека сезоната на пастрмајлијата е во месеците кои имаат буква „Р“ во името. Има ли нешто поубаво од вкусна пастрмајлија со меко и тенко тесто во комбинација со црвено винце?

Неодамна имавме можност да отпатуваме во Виница. Од Скопје до Виница, сега се стигнува за околу 1 час и 20 минути. Брзо и пријатно патување додека уживате во глетката на кочанските оризови полиња и гнездата на штрковите во Чешиново и Облешево.

Иако кај нас првата асоцијација за пастрмајлија е Штип, во центарот на Виница е сместена пицеријата “Рустикана“.

Виничани се познати како многу пријатни и топли луѓе кои ги ценат своите гости и знаат да направат да бидете навистина добредојдени.

Ова ни го потврдија и Сандра и Оливер – сопствениците на Рустикана, фамилијарен бизнис кој постои 5 години. Вистински домаќини и мајстори за пастрмајлија и пица.

Пастрмајлијата се подготвува на печка на дрва и е готова за 4 минути. Тестото се меси тазе секое утро. Месото се топи во уста. По ваша желба, може да биде и покриена со топен кашкавал одозгора. Феферончињата се домашни и крцкави.

Ние навистина уживавме во вкусната храна, пријатниот муабет со домаќините и топлата атмосфера во Рустикана. Ви препорачуваме да ги посетите при вашиот прв слободен викенд.