Промовирани првите четири изданија од едицијата сликовници за деца „Светулка“

Детали

понеделник, 16 декември 2019

Вчера во Детскиот креативен центар при МКЦ беа промовирани првите четири изданија од едицијата сликовници за деца „Светулка“, која ја организира издавачката куќа „Арт&Арт студио Батев “.

Промоторката Ана Голејшка Џикова им раскажа на дечињата за пораката што ја носат јунаците на овие четири сликовници, а вештиот уметник Спинус ја збогати програмата со својата циркуска претстава.

Едицијата „Светулка“ е составена од 15 нови поучни приказни напишани од неколку македонски автори, а првите изданија се илустрирани од илустраторката Иванка НиБа- академска сликарка, која работи како илустраторка и графичка дизајнерка. Непресушен извор на инспирација, како што таа вели, ѝ се детските цртежи, кои изобилуваат со фантазија, креативност и неповторливи форми.

Авторките на овие четири изданија ‒ Ана Батева, која воедно е и реномиран тетарски режисер, и Неше Рамовиќ, чии дела од книжевноста наменета за најмладите читатели за првпат ќе бидат издадени ‒праќаат силна порака за децата која е со поучен карактер од аспект на морални и мултикултурни вредности во општеството. Децата преку овие приказни ќе дознаат многу за тоа што значи да се чува природата, ќе ги согледаат големината на пријателството, значењето на различностите и силата и моќта на играта/работата во тим.

Сликовниците беа преведени на знаковен јазик, во видео форма, и беа подарени на дечињата со оштетен слух, кои исто така беа гости на оваа промоција. Во овој проект беа вклучени повеќе уметници и учесници од различни области: Кимова Соња, Никола Бочваров, Костадин Батев, Соња Стамболџиоска, Ивана Батев, Јадранка Ацеска, Иванка НиБа.

Изданијата ќе бидат преведени и на албански јазик, чија промоција ќе биде на саемот за книга, што го организира Центарот за култура „АСНОМ“ во Гостивар.

Сликовниците се во продажба од денес, а за наредните месеци најавуваме промоција на останатите сликовници од едицијата и уште неколку изненадувања.