Имаше концерти во скоро секоја земја, ја депортираа од Иран: Факти за Џос Стоун – соул легендата што ќе настапува во Скопје

Од 2014 до 2019 година, Џос Стоун направи светска турнеја и настапуваше во сите земји во светот, вклучувајќи ги Северна Кореја и Сирија. Но, не успеа да го одржи концертот планиран во Иран бидејќи ја депортираа веднаш штом пристигна во земјата.

Џос Стоун е еден од најпознатите соул изведувачи на денешницата.

Уште од рана возраст, Џос покажувала интерес за соул музика и американски R&B – нешто што подоцна ќе го оформи нејзиниот музички стил.

Почнала да се занимава со музика на многу рана возраст, а на свои 39 години, има изградено импресивна кариера на која само можеме да се восхитуваме.

На 21-ви јули, Џос Стоун доаѓа во Скопје, а додека нетрпеливо го чекате концертот, научете нешто повеќе за животот на талентираната пејачка.

Забавни факти за Џос Стоун:

Потекнува од големо семејство

Џос Стоун е родена во 1987 година, во англиското гратче Довер и е трето од четири деца.

Нејзиниот татко Ричард Стокер е сопственик на бизнис за увоз и извоз на овошје и јаткасти плодови, додека мајка ѝ Венди на почетокот ѝ била менаџер.

Има дислексија

Талентираната пејачка отворено има зборувано за нејзината дислексија и пречките што ѝ ги поставувала.

Во период кога не се обрнувало многу внимание на овој проблем, училиштето било вистински предизвик за неа.

Па, таа го напуштила училиштето на 16-годишна возраст.

Но, како што вели самата, ова ѝ дало шанса да се фокусира на уметноста што ја сака – музиката.

„Не бев глупава. Туку малку сум дислексична и академијата не ми е јака страна. Повеќе сум уметнички настроена“, има изјавено Џос во интервју.

Ја почнала кариерата на 13-годишна возраст

Додека се соочувала со предизвици на училиште, Џос всушност активно работела на нејзината музичка кариера.

Во 2001-ва, на 13-годишна возраст се пријавила на шоу за таленти на BBC (Star for a Night) – и победила.

Потоа се пријавила на уште едно шоу – Steps to the Stars – каде што исто така победила.

По овој успех, го привлекла вниманието на продуценти од Лондон и одовде почнува нејзината професионална музичка кариера.

Првиот албум го издаде на само 16 години

Благодарение на талентот, Џос Стоун релативно брзо се пробила. Откако потпишала договор со продукциската куќа S-Curve Records, го издала својот деби албум, и тоа на едвај 16 години.

Албумот го снимила во Мајами и Филаделфија и на него соработувала со доста успешни соул изведувачи од САД.

Албумот се покажа како огромен успех и беше во топ 40 на американската Билборд 200 листа.

Продолжува на следната страница...