Тори Спелинг за малку ќе го загубела окото: „20 дена не ги извадив контактните леќи, добив чир на рожницата“

Детали

четврток, 06 април 2023

„Ова ми е од лошите хигиенски навики“ - актерката Тори Спелинг, која сите ја помниме по улогата во популарната серија од 90-тите „Беверли Хилс“, деновиве ги загрижи своите обожаватели кога се појави на улица со розов превез на окото. Како актерката за малку целосно ќе го загубела видот на едното око?

Минатата недела Тори Спелинг (47) беше излезена заедно со нејзината пријателка Лаура Ругети, а нејзините обожаватели веднаш се загрижија затоа што актерката на фотографиите носи превез на окото.

Таа тогаш појасни дека има чир на рожницата и дека зема антибиотици.

Сега, Тори појасни дека самата си го нарушила здравјето на окото, заради лошите хигиенски навики.

„Малку е смешно, но јас сум виновна, сама си го направив ова. Значи, јас носам контактни леќи, но ги носам оние што се носат само по еден ден и на крајот на денот...

Значи, можам да барам колку сакам изговори, но признавам дека најчесто не ги вадам и спијам со нив“ – рече таа.

На прашањето колку најдолго ѝ се случило да ги носи контактните леќи, таа одговори:

„Седум недели... Не, мислам дека претерувам, но сум ги носела и по 20 дена. Знам дека треба да се засрамам. Така добив чир на рожницата на левото око“ – вели таа.

Тори раскажува дека лекарите ѝ рекле дека имала многу среќа, затоа што поминала само со помала повреда на окото и дека за 7 до 10 дена целосно ќе заздрави.

Инаку, под чир на рожница се подразбира отворена рана на рожницата, како резултат на инфекција на окото.

Чирот може да биде предизвикан и од премногу суви очи, а луѓето што страдаат од овој проблем честопати трпат силни болки, црвенило, чувство дека окото им е засечено, замаглен вид, чувствителност на светлина.

Б. С. Б. | Црнобело