Рајан Рејнолдс му ја исполни желбата на обожавател кој умира од рак: „Моето семејство ќе се сеќава на овој ден многу подолго од мене“

Детали

вторник, 25 април 2023

„Ми стоеше кнедла во грлото додека се дружевме. Размислував како ќе се чувствуваат неговите жена и децата откога него ќе го нема. Искрено, се прашувам дали јас би бил толку среќен и позитивен ако бевме во обратна ситуација. Џеј е неверојатна личност“, рече актерот Рајан Рејнолдс откако го запозна мажот кој боледува од рак.

Холивудскиот актер Рајан Рејнолдс помина неколку часа со Џеј Фиар (45), негов голем обожавател кој има рак во последниот стадиум, и му ја исполни желбата да се запознае со него и неговото семејство.

Средбата ја организираше хуманитарната организација Bucket List Wishes, која им помага на луѓето во Британија да си ги исполнат најголемите желби пред крајот на животот.

Рајан, кој од пред една година го поседува фудбалскиот клуб „Рексхам“ од Велс, често оди во Обединетото Кралство.

На една од последните посети, тој се запозна со Џеј, а времето поминато со него го опиша како „исклучително пријатно“.

„Ми стоеше кнедла во грлото додека се дружевме. Размислував како ќе се чувствуваат неговите жена и децата откога него ќе го нема.

Искрено, се прашувам дали јас би бил толку среќен и позитивен ако бевме во обратна ситуација. Џеј е неверојатна личност“, рече Рејнолдс за медиумите по средбата со Фиар.

Џеј има рак на слепото црево кој е во последната фаза и според предвидувањата на лекарите не му останува уште многу време.

Ракот го открил во јануари 2023 година и тогаш било предоцна за лекување.

Џеј и Рајан се сретнаа на стадионот на „Рексхам“ еден ден откако велшкиот клуб се пласираше во четвртата фудбалска лига.

Освен што зборуваа за фудбалот, кој и двајцата го обожаваат, Рајан на Џеј му подари ракавица што ја носел на снимањето на вториот дел на филмот „Deadpool“.

Рејнолдс му вети и дека ќе договори Џеј со семејството да го посети на снимањето на третиот дел од филмот, кое почнува наскоро.

„Ретко се тие луѓе што си ги запознаваат идолите, ама Рајан покажа дека е голем човек, не само голем актер. Луѓето мислат дека сето ова е за мене, но не е така.

Ова е за моето семејство, зашто тие ќе се сеќаваат на овој ден многу подолго од мене. Се надевам дека ќе им биде драг спомен,“ рече Џеј за BBC.

А. Ј. | Црнобело