Мајкл Џ. Фокс падна на сцена поради Паркинсоновата болест: „Битката е сè потешка, нема да доживеам 80“ (видео)

Детали

понеделник, 05 јуни 2023

На панел-дискусија за трилогијата Back to the Future, Мајкл Џ. Фокс падна на сцената откако изгуби рамнотежа поради Паркинсоновата болест. За среќа, не се повреди. Неполн месец претходно, тој сподели дека битката со болеста станува сè потешка и потешка, како и дека веќе почнал да размислува за својата смрт.

Мајкл Џ. Фокс веќе неколку децении води битка со Паркинсоновата болест, а неодамна имаше и мала незгода поради болеста.

На панел-дискусија за трилогијата Back to the Future во Филаделфија, актерот се качи на сцената, но изгуби рамнотежа и падна.

За среќа, 61-годишниот актер избегна повреда бидејќи падна на каучот поставен на сцената.

Во тој момент, на сцената беше и колегата од Back to the Future – Кристофер Лојд – кој изгледа загрижено и исплашено во мигот кога Мајкл падна.

https://www.youtube.com/watch?v=VWIRIgGspLw

Пред само околу еден месец, актерот откри дека битката со болеста, која има влијание врз нервниот систем и моторичките способности, станува многу, многу потешка.

„Паркинсоновата болест ми тропа на врата… Нема да лажам, станува потешко. Станува потешко. Секој ден е сè потешко… Тоа е што е“, изјави тој во интервју за CBS.

Актерот, кој е пензиониран поради болеста, изјави и дека не очекува да го доживее 80-тиот роденден.

„Не умирате од Паркинсон, умирате со Паркинсон. Па, имам размислувано за смртноста на болеста. Нема да доживеам 80“.

Мајкл се повлече од филмската индустрија во 2020 година. По дијагнозата во 1991-та, тој се посвети на зголемување на свесноста за болеста, како и собирање пари за истражувања.

Оттогаш, преку неговата фондација за Паркинсонова болест, тој има собрано над една милијарда долари.

Минатиот ноември, односно во 2022-ра, Мајкл доби и почесен Оскар за неговото залагање во врска со болеста.

Прочитајте и: Битката на Мајкл Џ. Фокс со Паркинсонова болест: „Ја имам од 29 години, постојано паѓав и кршев коски, но сега можам да одам сам“

Спирова С. | Црнобело