Едно дете им почина, двајцата беа со џуџест раст: Љубовта на актерот Ворвик Дејвис и сопругата траеше над 30 години

Парот имал и едно мртвородено бебе, а Саманта имала два спонтани абортуси пред да ги добијат децата Анабел и Харисон кои исто така се со џуџест раст.

Актерот Ворвик честопати има зборувано за здравствените проблеми што ги имаат со сопругата поради нивното нарушување.

„Гледате некој со џуџест раст и првото нешто што помислувате е дека е низок. Но, ова не е ни мал дел од предизвиците.

Може да биде полошо - може да го изгубите слухот или да завршите во инвалидска количка“, има изјавено тој.

Кога актерот се родил, на неговите родители им било кажано дека никогаш нема да оди и дека ќе живее најмногу до тинејџерските години.

А, низ детството, му биле направени неколку операции на нозете и стапалата за кои вели дека биле особено болни.

Актерот има откриено дека му се дислоцираат колковите, го болат колената, а секое утро се чувствува како да има грип.

Слични проблеми имала и сопругата – и нејзе ѝ биле направени бројни операции.

Но, во 2018-та, за време на рутинска операција, на Саманта ѝ се јавила сепса.

Тогаш лекарите му кажале на Воврик дека саканата нема да преживее, па тој и децата отишле да се збогуваат со неа.

Актерот има изјавено дека здравствените проблеми што ги искусуваат двајцата всушност ги зближиле.

А, откако Саманта ја преживеала сепсата, почнале да го живеат животот со полни гради.

„До денес Сем чувствува некои последици од сепсата, а да бидам искрен и јас исто.

Веќе не го земаме животот здраво за готово. Сега го ценам секој момент што го минувам со неа“ - изјави тој во една прилика.

Како пар, Ворвик и Саманта беа дел од многу организации за луѓе со џуџест раст и успешно ја сменија перцепцијата на јавноста за ова нарушување.

Тие имаат основано и своја добротворна организација во Англија која се фокусира на луѓето со џуџест раст.

Во последните години од животот, Саманта имала проблеми со одењето, но Ворвик имаше изјавено дека таа не дозволува ова да ја спречи да ужива во животот.

Не е познато која е причината за смртта на Саманта, но најверојатно се соочила со компликации поради нејзиното нарушување.

Спирова С. | Црнобело