Крај на љубовта: Џенифер Анистон и Џастин Теру се разведуваат

Детали

петок, 16 февруари 2018

По две и пол години поминати во брак, а седум како љубовна двојка, парот соопшти дека се разделува на пријателски начин.

Со заедничко соопштение испратено до медиумите, актерката Џенифер Анистон (49) и сопругот Џастин Теру (46) ги потврдија гласините дека се разведуваат.

„Во нормални услови, ова ќе го задржевме за себе, но за да ги избегнеме сите понатамошни шпекулации и измислици, сакавме директно да ја изнесеме вистината.“, стои во дописот што го потпишува гласноговорникот на Aнистон. „Што друго и да биде објавено, не доаѓа од нас, туку е нечија фиктивна приказна."

Џенифер и Џастин се забавуваа од 2011 година, а тајно се венчаа на 5 август 2015 година во Лос Анџелес. Одлуката за развод е обострана, а ја донеле сложно кон крајот на минатата година. Наспроти сѐ, сопружниците тврдат дека ќе останат во добри односи:

„Ние двајцата сме најдобри пријатели, па иако патиштата како двојка ни се раздвојуваат, имаме желба и понатаму да го негуваме нашето пријателство. А, пред сѐ, одлучни сме да ја одржиме длабоката почит и љубов што ја чувствуваме еден кон друг.“

Објавата за развод пристигна само неколку дена по 49-тиот роденден на Џенифер, којшто парот го помина одвоено. Додека Анистон славеше со пријателките во Малибу, Теру беше забележан во Њујорк.

После разделбата од Бред Пит, со кого беше заедно од 2000 до 2005 година, ова е вториот брак на Џенифер Анистон што завршува со развод. Во меѓувреме, глумицата беше во љубовни врски со Винс Вон и Џон Мајер.

Дали Џен ќе му се врати на Бред? Фановите веќе фантазираат за ваквото сценарио.

М. А. | Црнобело