„Не е посвоена, моја е“: Наоми Кемпбел (51) конечно го покажа лицето на ќерката – не открива кој е татко (фото)

Детали

вторник, 15 февруари 2022

Пред околу девет месеци, Наоми Кемпбел ги изненади фановите со вестите дека станала мајка, а бидејќи моделот немаше трудничко стомаче, се јавија шпекулации дека можеби ја посвоила ќерка ѝ - сега конечно Наоми го покажа лицето на ќерката и откри дека не е посвоена, но таткото и деталите ги држи во тајност.

Наоми Кемпбел конечно го покажа лицето на нејзината ќерка неколку месеци откако на Инстаграм соопшти дека станала мајка. Супермоделот и нејзината ќерка ќе ја красат насловната страница на мартовското издание на британскиот Вог.

51-годишниот супермодел не споделува речиси никакви детали за нејзиниот приватен живот, па новото интервју за британскиот Вог е вистинско освежување за фановите.

Во мај минатата година, Наоми Кемпбел сподели фотка на Инстаграм со која им соопшти на фановите дека станала мајка.

Само неколку денови претходно, супермоделот беше забележан на модната недела во Њујорк без трудничко стомаче, па постоеја шпекулации дека можеби станува збор за посвојување или сурогат.

Сега, во интервјуто за Вог, Наоми првпат зборува за нејзината ќерка, истакнувајќи дека таа не е посвоена. Моделот откри дека ќерката има девет месеци, но не се знае кој е нејзиниот татко и дали можеби ја добила со сурогат мајка.

Планот да стане мајка, Наоми го чувала во тајност и вели дека само најблиските пријатели и членови на семејството знаеле за тоа.

„Можам да ги избројам на една рака луѓето кои знаеја дека ќе добијам ќерка. Но, таа е најголемиот благослов што можам да си го замислам. Таа е најдоброто нешто што сум го направила“, открива Наоми.

Иако не споделува детали за ќерката, Наоми вели дека мајчинството е прекрасно искуство. Истовремено, таа вели дека воопшто не ѝ пречи што првпат стана мајка на 50-годишна возраст.

„Отсекогаш знаев дека еден ден ќе бидам мајка, но среќата што ја чувствувам сега е поголема од што можев да си замислам. Пресреќна сум што ја имам ќерка ми“.

„Речиси никогаш не плаче и навистина е внимателна за нејзина возраст. Многу се смее и како да зборува. Мислам дека ќе почне да оди пред да лази. И, веќе има шест заби!“, вели Наоми за девојчето.

Наоми открива дека каде и да оди – без разлика дали за работа или релаксација – нејзината ќерка е со неа. Таа вели и дека ќерката ѝ помага да го види светот со нови очи.

„Повторно сум како дете. Одново ги учам детските песнички, си играм и откривам колку прекрасни играчки има! И кукли! Работи за кои не сум ни сонувала“.

Иако има само девет месеци, ќерката на Наоми веќе има и свој гардеробер со дизајнерка облека. Според моделот, таа редовно добива подароци, а неодамна сподели и Инстаграм Стори на кое ќерка ѝ носи облека од Versace.

„Има навистина убави парчиња благодарение на многуте дизајнери и пријатели кои ѝ испраќаат подароци“.

Наоми открива и дека кога станува збра за мајчинството, најмногу се изненадила за нејзината посветеност кон ќерка си.

„Ќерката е секогаш на прво место. Сè што правам, правам за неа“.

Наоми првпат се појави во јавност со ќерката во јули минатата година во лежерно издание.

Како што напоменавме, Наоми никогаш не зборува за приватниот живот, па се верува дека е сингл и дека сама се грижи за нејзината ќерка чие име уште го нема откриено.

Наоми вели дека сега откако стана мајка, но и поради возраста, почнува да размислува да намали со ангажманите.

„Уште уживам, но некогаш е премногу! Бидејќи сепак, јас имам 51 година и соработувам со девојки кои имаат 18!“

Спирова С. | Црнобело