Најстариот син на Илон Маск сака да го промени полот и се откажува од татко му: „Не сакам да ме поврзуваат со него“

Детали

вторник, 21 јуни 2022

Најстарото дете на Илон Маск поднесе барање за промена на полот, а одлучи и јавно да се откаже од неговиот татко изјавувајќи дека не сака да го носи неговото презиме, ниту да биде поврзуван со него на кој било начин.

Милијардерот Илон Маск е татко на седум деца, а едното од нив, 18-годишниот Егзавиер, сега одлучи да си го промени полот, но и јавно да се откаже од презимето на татко му.

Според Daily Mail, Егзавиер побарал барање за промена на полот уште на 18-ти април, притоа барајќи да си го промени името во Вивиен Џена Вилсон – Вилсон е презимето на неговата мајка.

Заедно со барањето има и изјава со која Егзавиер се откажува од татко му:

„Повеќе не сакам да живеам или да бидам поврзуван со мојот биолошки татко на кој било начин“.

Уште не е познато што точно е причината за раздорот помеѓу Илон и неговото дете, а не е ни познато дали Егзавиер добива каква било финансиска помош од милијардерот.

Илон Маск има вкупно пет деца со мајката на Егзавиер и тие имаат заедничко старателство над нив.

Некои веруваат дека можеби причината за оваа необична одлука на Егзавиер се бројните изјави на милијардерот против трансродовите лица.

Во неколку наврати, Илон ги има критикувано трансродовите лица, а неговите изјави беа оценети како трансфобични.

Но, тој изјави и дека нема ништо против трансродовите лица – единствено му пречеле бројните лични заменки што трансродовите лица ги одбираат за себе.

Сепак, тој се нема огласено во врска со одлуката на неговото дете, па не се знае дали неговиот став е причина за конфликтот.

Како што веќе напоменавме, Илон Маск е татко на седум деца, но имал уште едно кое починало веднаш по раѓањето.

Во продолжение прочитајте повеќе за децата и нивниот однос со милијардерот:

Невада

Илон Маск го доби првото дете – синот Невада – со поранешната сопруга Џастин Вилсон. Невада се роди во 2002 година, но почина само 10 месеци по раѓањето.

Егзавиер и Грифин

Во 2004 година, милијардерот и поранешната сопруга Џастин ги добија близнаците Егзавиер и Грифин.

Освен одлуката за промена на полот на Егзавиер, во јавност не се познати речиси никакви информации за близнаците. Познато е и дека ги добиле со асистирано оплодување. 

„Си ги закопав чувствата и се справив со смртта на Невада така што отидов во клиника за асистирано оплодување само два месеца подоцна“, има изјавено Џастин.

Каи, Саксон и Дамијан

Илон и Џастин имаат и тројка, а и овојпат станува збор за асистирано оплодување.

Трите деца се можеби и подобро скриени од јавноста бидејќи од нив речиси и да нема фотографии, а и на оние што се достапни не се знае кој е кој.

Каи, Саксон и Дамијан се родија во 2006 година, а само две години подоцна Илон и Џастин се разведоа.

„Старателството на нашите пет деца е поделено еднакво. Речиси целото слободно време го минувам со моите момчиња, тие се љубовта на мојот живот“, изјави милијардерот кратко по разводот.

Сепак, сега е јасно дека не е во најдобар однос со нив.

Околу две години подоцна, Илон повторно стапи во брак со Талула Рајли, и тоа двапати. Првиот пат бракот траеше од 2010 до 2016 година, а вториот – од 2013 до 2016 година. Тие немаат заеднички деца.

X Æ A-Xii

Можеби најпознатото дете на Илон е синот што го доби со пејачката Грајмс во 2020 година, а кој привлече внимание поради чудното име.

Илон и Грајмс ја почнаа врската во 2018 година, но во септември 2021-ва соопштија дека се разделиле.

Exa Dark Sideræl

И покрај тоа што се разделија во септември, до крајот на 2021 година Илон и Грајмс го добија второто дете – овојпат ќерка, но повторно со необично име.

Парот го доби детето со сурогат мајка.

Кратко откако се роди ќерка им, Грајмс изјави дека Илон е нејзино момче во интервју за Vanity Fair.

„Би можела да го наречам мое момче, но нашиот однос е флуиден. Живееме во одделни куќи. Најдобри пријатели сме. Се гледаме постојано. Си имаме посебен однос и не очекувам другите луѓе да го разберат тоа“.

Но, само неколку часа откако беше објавено интервјуто, Грајмс сподели твит со кој откри дека повторно се разделиле.

Уште не е познато како Илон и Грајмс го поделиле старателството, но најверојатно заедно се грижат за нивните деца.

Спирова С. | Црнобело