Бил во депресија по разводот со бившата сопруга, го „наместиле“ со Клои Кардашијан – факти за Микеле Мороне, актерот од 365 Days

Детали

сабота, 01 октомври 2022

По разводот со сопругата паднал во депресија и не сакал да глуми, а една година пред да стекне светска слава работел како градинар за дневница. Вели дека Клои Кардашијан првпат во животот ја видел кога му рекле да се слика со неа во Милано – Факти за Микеле Мороне, заводникот од „365 Days“.

Микеле Мороне е италијанскиот заводник што ја толкува главната улога во филмот „365 Days“, а кого неодамна го поврзуваа и со ријалити ѕвездата Клои Кардашијан, откако тие двајцата заедно се појавија на црвен тепих во Милано.

Откако фотографиите почнаа масовно да се споделуваат во таблоидите и на социјалните мрежи, се огласи и актерот кој рече дека тоа било првпат во животот воопшто да ја види Клои и рече дека фотките биле направени на барање на ПР тимот на Dolce & Gabbana.

Во моментов Микеле важи за еден од најголемите заводници во филмската индустрија. Филмот „365 Days“ е огромен хит на стриминг платформата Netflix, иако според страницата за оцените Rotten Tomatoes има 0% позитивни критики.

Филмот е во полска продукција, а во него играат италијански актери што говорат на англиски јазик, а беше мошне критикуван затоа што промовира силување и насилство, со оглед на тоа што приказната се поврзува со кум на мафија кој киднапира една девојка и ја чува заклучена во неговата палата на една година, додека чека таа да се вљуби во него.

Сепак, иако се соочува со негативна критика, филмот му донесе инстантна слава на актерот, а тој вели дека е пресреќен заради вниманието што го добива.

Благодарение на улогата во филмот Микеле денес има над 15,5 милиони следбеници на Инстаграм, а сосема е јасно зошто и Клои Кардашијан сакаше да се фотографира со него во Милано.

Но, што знаеме за италијанскиот заводник по кого полуде женската публика од целиот свет?

Микеле е роден во 1990-та година во градот Битонто во Италија, што се наоѓа во регионот Пуља во Италија. Потекнува од сиромашно работничко семејство. Татко му бил градежен работник, а мајка му била шивачка, а има уште три повозрасни сестри.

Татко му починал кога актерот имал само 12 години, а во 2020-тата година тој објави песна што му ја посвети на него и како што рече сите негови спомени од татко му се собрани во видео-спотот за песната.

Студирал театарска уметност, а кариерата ја започнал со повеќе помали театарски и филмски улоги во Италија, но за него речиси никој и не знаеше сè до 2020-та година кога се појави во „365 Days“ во улогата на Масимо Торичели.

Микеле има два сина што ги добил од бракот со Руба Садех. Во 2014-та година, на возраст од 24 години го добил синот Маркус, а во 2017-та година и синот Брандо.

Руба е позната модна дизајнерка која работела за брендот Ellie Saab, а со Микеле се запознале во 2013-та година и се венчале една година подоцна. Во периодот додека биле заедно се обидувале колку може повеќе приватниот живот да го кријат подалеку од очите на јавноста.

Продолжува на следната страна...