15-годишната Русинка што изведе „невозможен“ скок обвинета за допинг - скандал на Олимписките игри

Детали

четврток, 10 февруари 2022

Кај 15-годишната лизгачка Камила Валиева било забележано присуство на лек кој е забранет за спортисти, па постои можност рускиот олимписки тим да го изгуби златниот медал. Сепак, некои сметаат дека ова е неправедно бидејќи наводно бил тестиран примерок од пред два месеца.

Камила Валиева од Русија ѝ обезбеди златен медал на руската репрезентација во уметничко лизгање на Олимписките игри, откако двапати изведе четирискок. 15-годишното девојче е првата лизгачка во историјата што успеала во овој подвиг.

Но, со новите сознанија, по сè изгледа дека медалот ќе ѝ биде одземен – церемонијата за доделување на медалите веќе е одложена.

Камила требаше да се натпреварува и самостојно, но поради скандалот голема е веројатноста да биде отстранета од натпреварот и покрај тоа што е миленичка на поголемиот дел од јавноста.

Имено, Камила добила позитивен тест за лек кој е забранет за спортските натпреварувачи.

Според рускиот медиум RBC, кај Камила било забележано присуство на триметазидин (trimetazidine) – лек кој спречува напади на ангина, односно остри болки во градите, вилицата и грбот предизвикани од голем физички напор или намален доток на крв до срцето.

Светската анти-допинг агенција го забранува овој лек за спортистите бидејќи може да им го зголеми дотокот на крв, како и нивната издржливост.

Засега не е познато дали Камила има историја со проблеми со срцето, ниту дали поднела барање за исклучок од правилото од здравствени причини.

Од Комитетот на Олимписките игри одбиваат да одговараат на прашањата од медиумите поради легални причини. Според Reuters, кодексот на анти-допинг агенцијата не дозволува јавно објавување на идентитетот на спортистите обвинети за допинг доколку се малолетни. Како што напоменавме, Камила има само 15 години.

Сепак, поранешниот генерален директор на агенцијата, Дејвид Хоуман, го сподели неговото мислење во врска со случајот:

„Најголемиот кошмар за секоја организација за атлети е тие да се натпреваруваат и потоа да добијат позитивен тест среде Олимписките игри.

Многу е необично да се добие позитивен тест помеѓу натпреварот и церемонијата за доделување медали. Обично спортистот кој ќе добие позитивен тест е дисквалификуван пред натпреварот, но тоа не се случи овојпат“.

Истовремено, на социјалните мрежи се огласи и познатиот руски новинар Василиј Конов, изјавувајќи дека примерокот на Камила што бил тестиран бил земен пред два месеца.

„Лекот триметазидин воопшто не им помага на спортистите. Кај Камила беше пронајден во еден примерок од декември. Во многу мали количини.

Немаше ништо во нејзините примероци од претходно и потоа. Овде нема допинг. Овој лек за срце нема влијание врз перформансот. Оставете ја Камила на мир“.

Лекот што е забележан кај Камила се наоѓа на листата на забранети супстанции од 2014 година.

„Ова не е лек што би го зеле случајно, не е нешто што се препишува вообичаено и дефинитивно не е нешто што би очекувале да му биде препишано на 15-годишно девојче.

Разочарувачки е што Русија продолжува да добива позитивни тестови на големи спортски настани“, вели поранешниот дирекор на анти-допинг агенцијата Дејвид Хоуман.

Претходно, на Олимписките игри во 2018 година, уште една руска спортистка – санкачката Надежда Сергеева – доби позитивен тест за истиот лек. Таа беше дисквалификувана од игрите и доби 8-месечна забрана за натпреварување.

Наводно, лизгачите избегнуваат допинг бидејќи поголемата мускулна маса, а со тоа и тежина, можат да им предизвикаат проблем. Но, неколкумина лизгачи биле фатени како си ја контролираат тежината со диуретици – сега и овие лекови се забранети бидејќи можат да го прикријат користењето на стероиди.

Според Time, руските лизгачи имаат долга историја на позитивни тестови за допинг. Од 2000 година наваму, најмалку пет лизгачи биле дисквалификувани од важни натпревари и првенства, а на некои им бил одземен и медалот.

Доколку ѝ биде одземен медалот на Русија, златото ќе го добие тимот на САД, на второто место ќе биде Јапонија, а Канада ќе добие бронза.

Прочитајте повеќе: 15-годишно девојче испиша историја на Олимписките игри со „невозможен“ скок - Која е Камила Валиева?

Спирова С. | Црнобело