Секоја чест! Македонката Катерина Ацевска е европска вицешампионка во џиу-џицу

Детали

понеделник, 08 април 2024

Македонија има убави вести за славење, нашата Катерина Ацевска го освои сребрениот медал на европското првенство во џиу-џицу што се одржа во Питешти, Романија.

Во Питешти, Романија, се одржуваше Европското првенство во џиу-џицу, а Македонија имаше неколкумина свои претставници: Александра Ацевска, Јаким Колевски, Антонио Стојчески и Данил Николиски.

Единствената дама меѓу претставниците нѐ направи горди и на нашата земја ѝ донесе сребрен медал.

Убавите вести се соопштени и на Фејсбук страната на Македонската џиу-џицу федерација.

„Европа има Вицешампион во женска конкуренција, а тоа е Катерина Ацевска.

Со три убедливи победи и пораз во финалето дојде до второто место и сребрениот медал.

Ова е втор медал од Европските првенства, после бронзениот од Франција. Позади нас останаа велесили како Франција, Португалија, Грција, Унгарија, како и уште 20 држави што имаа пријавено борци на Еврското првенство.

Нашите останати членови Јаким Колевски, Антонио Стојчески и Данил Николиски и покрај храбрите и одлични борби не успеаја да дојдат до еден од медалите. Со оглед на сериозноста на турнирот собраа многу искуство што носи едно вакво Европско првенство.

Им честитаме на сите борци, секоја чест за Катерина Ацевска.

Благодарност и до тренерите Александар Ацевски и Христијан Јованов, како и до Ицо Колевски кој како техничка поддршка беше со екипата во Романија“ - стои во објавата.

Катерина се натпреваруваше во категоријата над 70 килограми, а во финалето загуби од Германката Лота Сандер.

Таа е член на Македонската џиу-џица федерација и на џиу-џицу клубот „Дан-Кју“ од Скопје.

Поттикнати од пораката на новата иницијатива на Македонски Телеком „Да направиме место за вистински да се поврземе“, којашто поттикнува отвореност и меѓусебно разбирање, за што говореше и Горан Стефановски, редакцијата на CRNOBELO.com ќе направи повеќе место за добри вести и приказни кои инспирираат.

Б. С. Б. | Црнобело