ЕМОФ Скопје 2025: Бреслиева остана без медал во таеквондо, Смилев осми во финалето на К1-слалом

Детали

петок, 25 јули 2025

На четвртиот натпреварувачки ден, двете македонските репрезентации во Баскет 3х3 доживеаја порази од Словенија. Девојките беа совладани со 6:16, додека момчињата загубија од словенечките врсници со 15:21.

Македонската натпреварувачка во таеквондо, Душица Бреслиева остана без медал на четвртиот натпреварувачки ден на Европскиот Младински Олимписки Фестивал - ЕМОФ Скопје 2025, откако загуби во четвртфиналната рунда од Карла Сесар од Шпанија со 0:2. Претходно во текот на денот, Бреслиева ја забележа првата победа за Македонија во рамките на боречките спортови на ЕМОФ, откако ја совлада Матеа Јакобсен од Норвешка со 2-0, а во втората рунда Душица триумфираше и против Украинката Анастасија Хаиворонска со 2:1.

И двете македонските репрезентации во Баскет 3х3 доживеаја порази од Словенија. Девојките беа совладани со 6:16, додека момчињата загубија од словенечките врсници со 15:21.

Македонскиот кајакар Кристијан Смилев го освои осмото место во финалната трка во дисциплината К1-слалом во поединечна конкуренција, пристигнувајќи на целта со време 1:47,64. Во трката на Матка, златниот медал му припадна на Марек Кулчучки од Полска, среброто го освои Австриецот Макс Штрајнбренер, а бронзата се најде на градите на Јохан Шмит од Германија.

Во истата дисциплина кај девојките триумфираше Барбора Ондрачкова (Чешка), додека во категоријата C1, Лео Роје (Франција) и Патриција Иваниец (Полска) обезбедија златни медали со импресивни настапи.

Во бадминтон, Велика Британија славеше двојна победа – Каљан Маној и Ишасрија Мекала ги освоија златните медали во поединечните категории за момчиња и девојки. Во спортската гимнастика, Франција го освои златото во мешаниот тимски натпревар, а Италија и Израел ги комплетираа местата на подиумот.

Во атлетските натпревари на националната арена „Тодор Проески“, Закарија Диа од Франција стигна до златото во скок со стап, прескокнувајќи импресивни 5,20 метри, пред Иван Варга од Унгарија и Виктор Јарошевич од Полска. Финалето на 800 метри за момчиња беше возбудлива трка до самиот финиш, при што Андор Шуман од Германија го освои златото со време од 1:48.82, непосредно пред Умед Карачио од Италија и Ленерт ван Дајк од Белгија.

На улиците на Куманово, друмските велосипедски трки беа неизвесни до самиот крај. Ана Бонаси од Италија победи во трката за девојки со време од 1:03:00, додека Никлас Висмајр од Австрија го освои златото кај момчињата, во драматична завршница пред конкурентите од Франција и Велика Британија.

Во Олимпискиот базен во Скопје, Алесандра Мао од Италија исплива доминантна трка во финалето на 200 метри слободно за девојки, освојувајќи злато со време од 2:00.13. Остин Андерсон Менли (Велика Британија) додаде уште едно злато во својата колекција во финалето на 200 метри грбно за момчиња, додека Борока Жофија Кертес (Унгарија) доминираше во финалето на 100 метри делфин за девојки.

Златниот медал на 50 метри слободно за момчиња го освои Микита Лјах (БОО), а мешаната штафета 4x100 метри мешано заврши со фото-финиш – Италија ја победи Велика Британија за само 0.02 секунди.

Додека ЕМОФ Скопје 2025 се приближува кон своите последни денови, настапите стануваат сè повпечатливи — демонстрирајќи не само талент, туку и единство и дух на европскиот младински спорт во неговата најдобра форма.