„Косата ми побеле на 9 години, па ме викаа баба - сега имам 25 и ги сакам моите сребрени прамени“

Детали

четврток, 23 март 2023

„Не ја прифаќав отсекогаш седата коса и не се чувствував самоуверена. Сега тоа е мојата карактерна особина што ме одредува. Луѓето секогаш мислат дека сивата боја е лажна“, вели Зои Миола која почнала да оседува на 9 години, а до својата 12-та година била 10% сива. Од дете чувствувала несигурност и срам, особено кога ја нарекувале „баба“.

Зои Миола (25) скоро цел живот има седа коса. Прамените почнале да ѝ побелуваат кога имала само 9 години. Врсниците биле сурови, постојано ја задевале и ја викале „баба“.

Но, со помош на најблиските, таа успеала да ја надмине траумата и сега е горда на својата сребрена коса.

Уште на 12 години почнала да ја бојадисува косата, но решила да престане шест години подоцна, кога заминала на колеџ за уметност, пренесува „Daily Star“.

До 21-та година, нејзината седа коса ѝ пораснала до раменици, па ја скратила преостанатата темна коса долу и останала 100% седа.

Зои сега го сака нејзиниот уникатен изглед и се шегува со момчето Мет Грифин (32), дека се „оган и мраз“ бидејќи тој има огнено-црвена коса.

„Не секогаш ја прифаќав седата коса и не се чувствував самоуверена. Сега тоа е мојата карактерна особина што ме одредува. Луѓето секогаш мислат дека сивата боја е лажна, а јас секогаш им возвраќам: ’Дали навистина мислиш дека толку многу го средувам коренот?‘“

Зои се сеќава дека нејзиниот татко Ралф прв ја забележал нејзината седа коса.

„Татко ми ми најде седо влакно и остана подзинат. Рече: ’Што се случува по ѓаволите?‘“, вели таа.

Но, белата коса ѝ е наследна, бидејќи и нејзиниот татко го пронашол своето прво седо влакно на 12-годишна возраст, а нејзината баба Ени имала 14 години кога видела бел прамен.

„Татко ми секогаш ме потсетуваше колку е убава нашата седа коса. Откако станав доволно возрасна, почнав да се гордеам со моите бели прамени“, вели Зои.

Сега 90% од косата ѝ е сива, а таа целосно го прифаќа својот нов изглед.

„Луѓето не се навикнати на млад човек со толку сиво. Неколку од моите пријатели сега имаат само неколку побелени влакна, но поради мене не се плашат,“ додава таа.

Зои додава и дека косата е нејзината најдобра карактеристика и се грижи да ја одржува здрава со крем за коса, масла и фризерски третмани.

„Не ја мијам косата повеќе од еднаш неделно. Внимателна сум и не штедам на производи. Таа е мојата најдобра карактеристика, па се погрижам секогаш да е во врвна форма. Се надевам дека ќе му покажам на светот дека можете да ја прифатите природната убавина. Седата коса не е страшна работа. Покажува мудрост“.

А. Ј. | Црнобело