„Преживеав мозочен удар на 33 години - како илјадници игли да ме боцкаа во мозокот, се разбудив од сон“

Детали

вторник, 02 април 2024

„Не се чувствував добро, имав посилна болка од вообичаено. Се чувствував како илјадници игли да ме боцкаат во мозокот“ - раскажува оваа мајка на 4 деца, која преживеала мозочен удар на 33 години, а сега 4 години подоцна сѐ уште ги чувствува последиците.

Сара Мајлс од Австралија имала само 33 години и била мајка на 6-месечно бебе кога доживеала мозочен удар, од кој и сега, 4 години подоцна ги чувствува последиците, а својата приказна ја раскажува за светските медиуми.

Оваа мајка на 4 деца во сон почувствувала силна главоболка и се разбудила, но успеала повторно да заспие.

Само неколку часа подоцна, кога се разбудила, следувал вистински шок  за неа.

Таа забележала дека целосно го загубила периферниот вид на двете очи, односно не можела да види ништо отстрана.

„Вообичаено не страдам од главоболки и ако случајно ме боли глава не пијам лекови, само чекам да помине болката.

Но, ова беше поинаку. Не се чувствував добро, имав посилна болка од вообичаено.

Се чувствував како илјадници игли да ме боцкаат во мозокот. Не можев да видам ништо отстрана, сѐ беше црно, но мислев дека тоа е последица на замор. Бев мајка на новороденче“ – раскажува Сара.

Нејзиниот сопруг веднаш почнал да ги пребарува симптомите на Гугл и ѝ рекол дека е можно да има мозочен удар, на што Сара се насмеала, затоа што немала никакви други симптоми освен главоболката и проблемите со видот.

Сепак, Сара отишла на лекар, каде по низа тестови било утврдено дека таа навистина преживува мозочен удар и дека имала тромб во артерија во задниот дел од вратот, кој стигнал до задниот дел од мозокот и заради тоа предизвикал загуба на видот.

За среќа, таа поминала без операција и добила само лекови за разложување на тромбот, а вели дека штом се вратила дома, немала премногу време да одмара, туку морала да им се врати на обврските околу нејзините 4 деца.

Таа цела година редовно требало да прима лекови, а на секои 4 месеци одела на прегледи со магнетна резонанца.

„Постоеше ризик од нов удар заради првичниот, па постојано бев под стрес.

Мислам дека во првите 12 месеци правев сѐ за да не дозволам целосно да ме обземе стравот.

Но, потоа си реков себеси: ‘Што биде - нека биде! Морам да продолжам со животот’“ – раскажува таа.

Таа денес има 37 години и е релативно здрава, но сѐ уште ги чувствува последиците од мозочниот удар.

На десното око целосно го загубила периферниот вид, чувствува замор, дефокусираност, а и пречат и гласни звуци, толпа, или силна светлина.

„Како да се загубив себеси и морав повторно да учам голем број работи. Го немав истиот капацитет додека ми заздравуваше мозокот и тешко ми беше да се справам со тоа“ – раскажува Сара и вели дека и сега ѝ се случува говорот да ѝ биде отежнат или да има проблем да се сети на зборовите што треба да ги каже.

Таа вели дека сега води многу поголема сметка за своето здравје и при првите знаци дека нешто не е во ред - не чека, туку веднаш оди на лекар.

Б. С. Б. | Црнобело