Има само 236 жители, немаат брави на вратите: Каков е животот на еден од најизолираните острови на светот?

Детали

вторник, 26 ноември 2024

Дали некогаш си замислувате за дом од соништата кој се наоѓа на некој зафрлен, идиличен остров со преубави пејзажи?

Ако е така, тогаш ќе ви се допадне приказната за Тристан да Куња.

Тристан да Куња е група од острови во јужниот дел на Атлантикот, 2.816 километри од Јужна Африка и 3.360 километри од Јужна Америка. Островите се дел од британските прекуморски територии.

Територијата на овие острови се состои од главниот вулкански остров Тристан да Куња, со површина од 98km2, како и од неколку ненаселени острови како што се Непристапниот Остров, Славеевите Острови и островот Гоф, 395 километри југоисточно од Тристан, на коj е поставена метеоролошка станица.

На островoт Тристан да Куња живеат само 236 луѓе во едно село, во заедница која е затворена кон надворешниот свет.

Односно, тоа се само десетина семејства, кои добро се познаваат меѓу себе и кои толку си веруваат еден на друг што дури не ги заклучуваат вратите од своите домови.

Во едно постаро интервју за BBC eден жител има изјавено: „Вашите деца можете да ги пуштите секаде, буквално секаде. Ние не ги заклучуваме вратите, ниту ги затвораме прозорците кога излегуваме“.

Звучи идилично, зарем не?

Но, овој остров не може да ви биде дом освен ако немате семејно потекло оттаму, пишува на официјалниот сајт на островот.

Исто така нема понуда на работни места, освен некои специфични професии како доктор, професори, научници и слично, но со договори од по 2 години.

Гордост на локалците е јастогот, кој одлично го приготвуваат и исто така го извезуваат.

На островот се стигнува само со брод. Се тргнува од Јужна Африка и се патува околу една седмица.

Локалните жители им се радуваат на посетителите и со задоволство ги споделуваат нивните традиција и култура, но речиси и нема туристи поради далечината. 

Природата, пак, е неверојатна – насекаде има карпи и фоки.

Отпатувајте на островoт Тристан да Куња преку фотографии:

С. С. | Црнобело