Инфекција на градите, нос со некроза: Морничавата вистина зад „живите барбики“

Детали

недела, 23 ноември 2025

Инфекции по лошо изведени операции, отоци поради филери во непроверени клиники – таканаречените „живи барбики“ буквално си го ризикуваат животот поради опсесијата да изгледаат како познатата кукла.

Пластичните операции се попопуларни од кога било и додека некои прават само минимални корекции, постојат луѓе кои одат до крајности.

Од 2012 година, почнаа да се прославуваат и таканаречените „живи барбики“ – жени кои прават толку многу корекции и операции, што повеќе личат на кукла, отколку на човек.

Но, ова одење до екстреми не е без ризици и дел од најпознатите „живи барбики“ навистина си го имаат загрозено животот.

Морничавата вистина зад нивните трансформации:

Алисија Амира

Инфлуенсерката Алисија Амира има изјавено дека потрошила над 250.000 долари за да изгледа како жива барбика. А, се соочила со проблеми уште по првата операција.

Алисија првпат ги зголемила градите во 2016-та, но по операцијата добила опасна инфекција.

Се изборила со инфекцијата, по што била советувана да стави помали импланти, но наместо тоа, таа сакала да отстрани дел од ребрата и да го зголеми задникот.

Потоа уште еднаш ги зголемила градите, а направила и операции на челото, очите, носот и усните.

Операциите не ѝ биле доволни, па дополнително почнала да става и филери.

Иако вели дека веќе ѝ е тешко да најде козметичар кој се нафаќа да ѝ ги прави процедурите, не планира да се откаже.

Кери Мајлс

Кери Мајлс потрошила речиси 300.000 долари за да се трансформира во жива барбика, а изминатите десет години има направено две операции на носот, две операции на градите и редовно користи филери на лицето.

Бидејќи било јасно дека е опседната, нејзиниот хирург веќе одбивал да ѝ прави пластични операции.

И Кери имала инцидент со процедура – во 2016 година ставила филер кај непроверен козметичар.

Покрај големиот оток, чувствувала болка, а не можела ни да ја движи усната.

Кога отишла на лекар, ѝ кажале дека филерот што ѝ бил инјектиран бил измешан со некакво масло, па оттаму реакцијата.

Сепак, овој инцидент не ја одвратил од намерата да продолжи со операции и процедури, а вели дека се надева дека нејзината ќерка ќе ги следи нејзините стапки.

Џесика Алвес

Џесика, која е трансродова личност и пред пет години со промени полот, е меѓу најпознатите „живи барбики“.

Пред да го промени полот, сакаше да изглед како „жив Кен“, но сега главната цел ѝ е да личи на Барби.

Таа има ставено импланти на градите и задникот, има направено 12 операции на носот, а отстранила и четири ребра за да има потенка половина.

Од една операција на носот, Џесика речиси го загубила животот.

Таа отишла во Иран за да ја направи операцијата, а околу две недели подоцна, носот ѝ се вцрвил.

Веднаш отишла на лекар каде што ѝ кажале дека има некроза, односно ткивото на носот почнало да умира поради инфекција.

Лекарите ја спасиле и ја предупредиле да престане, но Џесика оттогаш има направено уште неколку операции.

Спирова С. | Црнобело