1 во 200 милиони: Пар од Англија добил идентична тројка, откако лекарите ги советувале да абортираат едно

Детали

среда, 25 декември 2024

Млад пар од Англија во октомври добил идентична тројка, откако лекарите прогнозирале дека децата нема да преживеат бидејќи бременоста била ризична. Сега, по три месеци, дечињата конечно се пуштени дома, навреме за Божиќ.

Шенон и Ејс Пејџ од Англија го добиле најубавиот подарок за Божиќ – прослава со нивните три дечиња.

Тие добиле идентична тројка – нешто што се случува еднаш на 200 милиони случаи.

За Daily Mail, 29-годишната Пејџ открива дека лекарите ги советувале да абортираат едно дете бидејќи бременоста била ризична.

Но, Шенон и нејзиниот 28-годишен сопруг им верувале на своите инстинкти, па дури и се преселиле во Бристол за да бидат во близина на подобро опремена болница.

Дечињата биле родени предвремено, во 29-тата недела, на 6-ти октомври.

По три месеци во болница, семејството конечно било пуштено дома, точно за католичкиот Божиќ.

„Беше лудо. Практично живеевме во болницата и пробувавме да го преживееме секој ден.

Но, сега на момчињата им оди одлично, не се хранат преку цевка, туку ги храниме со шише.

Тоа што сме дома за Божиќ е најдобриот подарок што можевме да го посакаме. Навистина сме среќни“, вели Шенон.

Шенон и Ејс се заедно од тинејџерските години, а пред една година почнале третман за асистирано оплодување.

Само неколку недели подоцна, лекарите им соопштиле дека Шенон.

Најпрво мислеле дека имаат близнаци, но на прегледот во деветата недела од бременоста, лекарите сфатиле дека Шенон носи тројка.

Но, бременоста била тешка за Шенон и по 17-тата недела, почнала дури и да се онесвестува.

Набрзо Шенон била дијагностицирана со компликација која може да се јави кај жени кои носат две или повеќе деца.

Состојбата може да настане кога бебињата делат плацента, а едното добива повеќе хранливи материи од другите.

Со ова, животот на две од бебињата бил загрозен, па Шенон била советувана да го абортира едното дете.

Но, парот не можел да се помири со помислата да изгуби едно дете, па решиле да им веруваат на инстинктите.

Проблемите за парот не завршиле овде – во 19-тата недела откриле дополнителни проблеми, што значело дека Шенон може да почне да се породува во секој момент.

Па, Шенон и Ејс привремено се преселиле во изнајмена куќа во Бристол, во близина на неонатална клинка.

„Лекарите беа сигурни дека нема да издржиме повеќе од 21 недела. Ако беа во право, немаше да преживее ни едно дете.

Неколку лекари ни кажаа дека е подобро да абортираме едно, па и две бебиња, за да преживее барем едно.

Одлучивме да не го прифатиме советот и сега сме благодарни за нашиот избор“.

За среќа, трите бебиња се родиле живи во 29-тата недела.

По раѓањето имале некои проблеми со здравјето, но конечно, пред Божиќ биле пуштени дома.

„Со сопругот не сме религиозни, но веруваме дека ова е дар од Бог.

Прво мислевме дека никогаш нема да имаме деца, а сега еве нè, со три“, вели Шенон.

Спирова С. | Црнобело