Почина „заспаниот принц“ од Саудиска Арабија: Помина 20 години во кома, по сообраќајка

Детали

недела, 20 јули 2025

По две децении во кома, 36-годишниот Ал-Валид од Саудиска Арабија, попознат како „заспаниот принц“, почина во болница во Ријад. Тажните вести ги сподели неговиот татко, кој 20 години не губеше надеж дека син му ќе се разбуди.

Ал-Валид бин Калед бин Талал од Саудиска Арабија, попознат како „заспаниот принц“ помина две децении во кома по сообраќајка во Лондон.

Сега неговото семејство откри дека 36-годишниот принц починал вчера, 19-ти јули.

Тажната вест ја сподели неговиот татко, принцот Калед бин Талал Ал Сауд, со емотивна објава на Твитер.

„Со срца исполнети со вера во божјата волја и судбина и со длабока тага и жалост, го оплакуваме нашиот сакан син, принцот Ал-Валид. Нека Алах му се смилува. Денес тој почина“.

Принц Ал-Валид бил запишан на колеџ во Лондон кога ја доживеал сообраќајната несреќа. Тогаш имал само 15 години.

По сообраќајката, принцот бил пренесен во болница во Ријад, каде што помина 20 години во кома.

Иако лекарите прогнозирале дека има минимални шанси да се разбуди, неговиот татко не губеше надеж дека состојбата на принцот ќе се подобри.

Во двете децении, принцот не покажа никакви знаци на свесност, освен во 2020 година, кога малку ги придвижи прстите на едната дланка.

Сепак, не се разбуди ни тогаш.

Во април годинава, принцот наполни 36 години, а откако се случи несреќата, неговиот татко постојано е покрај него и многупати има споделувано фотографии од него во болница.

Прочитајте и: Наполни 36 години, 2 децении е во кома: Кој е „заспаниот принц“ од Саудиска Арабија?

Спирова С. | Црнобело