Влезе во кралската палата и го уби целото семејство - Најголемиот масакр во историјата на Непал го изврши принц

Детали

недела, 14 септември 2025

Хималајската држава Непал, која сега е демократска република, во минатото била кралство, на почетокот на 21-иот век, во само три дена ги погреба својот крал, кралица, престолонаследникот и уште шест членови на кралското семејство.

На 1 јуни 2001 година, сè било како и вообичаено во палатата Нарајанхити, резиденцијата на непалското кралско семејство во Катманду.

Ова бил сосема обичен ден, во кој семејството организирало една од бројните прослави, но ништо не навестувало дека ќе се случи трагедија.

Кралот Бирендра и кралицата Ајшварја славеле и разговарале со своите гости, кога одеднаш нивниот син, принцот Дипендра, влегол со огнено оружје во просторијата.

Тој ги застрелал татко си, мајка си, помладиот брат Нирајан, сестра си Шрути и пет други членови на семејството, а потоа си пукал самиот во главата.

Напаѓачот сепак преживеал, паднал во кома и додека лежел на смртна постела без свест во болницата - бил прогласен за крал.

Сепак, не доживеал да ја носи круната, бидејќи починал три дена откако пукал врз своето семејство.

По ова, титулата крал му припаднала на принцот Гјанендра, брат на покојниот крал Бирендра.

По 24 години, не е разјаснето зошто непалскиот принц си го уби целото семејство.

Во јавноста и во медиумите се појавија разни теории, а една од првите е дека принцот бил скршен од болка, затоа што не му било дозволено да се ожени.

За време на престојот во Велика Британија, тој се заљубил во Индијката Девиани Рана, но семејството не му дало благослов, бидејќи мајката на Девиани била член на пониската класа на кралското семејство на Индија, додека нејзиниот татко имал неповолни политички врски.

Многумина верувале дека влијанието на Индија врз Непал ќе биде огромно доколку се склучи овој брак.

Дури и огромното богатство на потенцијалната невеста не можело да го убеди непалското кралско семејство дека таа е добар избор за Дипендра.

Нејзините родители биле дури и побогати од кралот на Непал, а нејзината мајка, наводно ѝ рекла на Девиана дека квалитетот на нејзиниот живот ќе се намали ако се омажи за принцот.

Кралот и кралицата на Непал за својот син избрале девојка од соперничка гранка на непалскиот клан Рана, наместо жената што ја сакал.

Друга поголема теорија е дека мотивите на Дипендра за убиствата биле политички.

Принцот, наводно, не бил задоволен од преминот од апсолутна кон уставна монархија и тоа што татко му се откажал од својата огромна моќ по непалската револуција во 1990 година.

Многумина сметаат дека ова е вистинската причина, бидејќи Дипендра со многу ентузијазам ги поздравил промените во земјата, најмногу затоа што во тоа време бил на студии на Итон во Обединетото Кралство.

Но, и покрај промената, приказните за кралското семејство и една од најголемите трагедии во земјата во изминатите децении, и понатаму предизвикуваат многу контроверзии и прашања.

Непалците често се прашуваат колкава била грижата за безбедноста на кралот, но и зошто Гјанедра, братот на кралот, кој седна на престолот по масакрот, не бил присутен на забавата тој ден.

Имаше шпекулации за неговата вмешаност во злосторството, а некои теории одеа дотаму што истакнаа дека е необично што принцот Дипендра се застрелал во левата слепоочница иако ја користел десната рака.

Истрагата за масовното убиство на непалското кралско семејство траеше само две недели, а Непал ја отфрли понудата на британскиот Скотланд Јард за помош, поради што многу прашања и денес остануваат без одговор.

Неколку години подоцна, во 2006-та, монархијата во Непал беше укината, по гласање во парламентот, а во 2008 година официјално стана федерална република и името на државата се преименува во „Федерална Демократска Република Непал“.

Кралот Гјанедра, пак, денес ужива во своето богатство, кое се проценува на повеќе од 100 милиони долари, и не се меша многу во политиката на земјата откако е укината монархијата.

Сепак, во март 2025 година, се појави пред 10.000 поддржувачи на монархијата, кои бараат нејзино повторно воспоставување поради незадоволство од состојбата во земјата, а објави и видео во кое вели дека е загрижен за нивото на демократија во Непал.

А. Ј. | Црнобело