Девојка родена без голем мозок е медицинско чудо – прослави 20-ти роденден, лекарите ѝ предвидувале најмногу 4 години

Детали

вторник, 11 ноември 2025

Алекс Симпсон од САД е родена со ретко нарушување поради кое нема голем мозок, туку само дел од малиот мозок. Таа не може сама да јаде и дише, а не може ни да слуша ни да гледа, и лекарите не верувале дека ќе живее повеќе од четири години. Но, неодамна го прославила 20-тиот роденден.

Девојка од Небраска, САД се смета за медицинско чудо бидејќи е родена со ретко нарушување, поради кое ѝ недостасува речиси целиот мозок.

На Алекс Симпсон лекарите ѝ предвидувале најмногу четири години живот, но и покрај лошите прогнози, неодамна таа го прославила 20-тиот роденден.

Нарушувањето што го има Алекс е познато како хидраненцефалија и е состојба поради која не се развиваат хемисферите на големиот мозок, па овој дел од черепот е исполнет само со течност. Кај Алекс се развил само мал дел од малиот мозок.

„Нарушувањето значи дека таа нема мозок. Има само мал дел од мозокот, со големина на грашок, но тоа е сè“, вели нејзиниот татко Шон.

Алекс не може да зборува, да гледа или да слуша, но нејзините родители веруваат дека може да го почувствува нивното присуство.

Тие сметаат и дека љубовта што ѝ ја пружат на ќерка им има голем удел во тоа што одживеала многу повеќе од прогнозите на лекарите.

„Пред 20 години бевме многу исплашени, но вербата е она што нè одржа во живот. Нашата ќерка е вистински борец“.

Ова нарушување е мошне ретко и 90% од бебињата умираат уште во матката.

Ако го преживеат породувањето, на почетокот бебињата изгледаат сосема здраво. Ваков бил случајот и со Алекс, па нејзините родители не се ни посомневале дека има некаков проблем.

Мајка ѝ Лорена вели дека и бременоста поминала без компликации.

„Немаше знак дека има некаков проблем. Дури и кога Алекс се роди, ја прегледаа и сè изгледаше дека е во ред“.

Но, кога отишле дома, Алекс не престанувала да плаче.

Најпрво лекарите мислеле дека има проблеми со дигестивниот систем, но кога дијагнозата не вродила со резултат, почнале да прават други испитувања.

Откако ѝ направиле снимка со магнетна резонанца, лекарите сфатиле дека девојчето речиси и да нема мозок.

Кога добиле дијагноза, лекарите им рекле на родителите дека е чудо што Алекс воопшто се родила жива, но и дека нема да живее многу долго.

„Беше ужасно бидејќи не знаевме дали ќерка ни ќе ја преживее ноќта.

Три години спиев со неа, проверував дали дише, дали се движи. Секоја ноќ се молевме да преживее“, вели мајка ѝ.

Но, Алекс сепак се борела, иако нејзините родители велат дека не секогаш е лесно.

Таа е под постојан надзор, дише со помош на машина и се храни со цевка бидејќи не може да ги контролира јазикот и вилицата.

Бидејќи бара постојана грижа, родителите имаат најмено и медицинска сестра.

Иако Алекс не може да комуницира, нејзините родители велат дека забележуваат кога е среќна.

„Нејзината медицинска сестра вели дека некогаш постојано се смее. Не реагира како останатите луѓе, но со нејзините интеракции можеме да познаеме дека е среќна.

Многу луѓе мислат дека е само во вегетативна состојба и сме слушнале многу негативни коментари.

Но, нашата цел е да им покажеме на луѓето дека само затоа што некој има пречки во развојот, не значи дека нема право да ужива во животот“.

Спирова С. | Црнобело