Убави вести од 2025-та кои поминаа незабележано: Во Хелсинки немало ниту една жртва во сообраќајка

Бројот на китови во Северноатлантскиот Океан почна да се зголемува

За жал, во само неколку децении го видовме изумирањето на бројни животински видови, неретко предизвикано од човечки фактори.

Меѓу засегнатите животни беа китовите во Северноатланскиот Океан на кои им се закануваш изумирање поради честото ловење. Овие животни честопати страдаат и од рибарските мрежи бидејќи се заплеткуваат во нив, а има и многу ситуации кога се судираат со бродови и умираат.

Но, според извештај од октомври минатата година, бројот на загрозените китови почнал да се зголемува.

Сега се проценува дека во океанот има 384 китови од најзагрозениот вид, што е зголемување за над 7% од 2020 година.

Околу 90% од електричната енергија во Костарика е добиена преку обновливи извори

Костарика е лидер кога е во прашање користењето електрична енергија од обновливи извори.

Над 90% (според некои извори и до 98%) од електричната енергија се добива со помош на обновливи извори.

Ова значи дека покрај домаќинствата, и фабриките и институциите главно користат струја од обновливи извори.

Со ова драстично се намалува загадувањето на воздухот, почвата и водата, но и сметките за струја се многу пониски.

Генерално, Костарика веќе неколку години наназад е пример дека е возможно речиси целосно да се префрлиме на обновливи извори на енергија, со што ќе решиме многу проблеми со кои се соочуваме.

Во Хелсинки немаше ниту една смрт од сообраќајка во период од 12 месеци

Додека кај нас сообраќајките, но и жртвите во сообраќајот како да се зголемуваат, ситуацијата е многу поразлична во Хелсинки.

Од јули 2024-та до јули 2025-та, во престолнината на Финска ниту едно лице не загинало во сообраќајка.

Ова се должи на неколку фактори. На пример, околу училишта и повеќето населени области, брзината на возење е ограничена на само 30 километри на час, наместо на 50.

Покрај тоа, градот има одлична инфраструктура за пешачење или возење велосипед, како и функционален јавен превоз.

Сето ова ја намалува потребата за автомобил и директно влијае врз бројот на сообраќајки.

Низ градот има и камери кои ја следат брзината на возачите.

Спирова С. | Црнобело