Зошто постои апликација за слабеење и шминкање на деца?!

Детали

понеделник, 28 ноември 2016

Денес постои апликација за телефоните која може да направи лицето на децата да изгледа послабо, а со тоа и „поубаво и позгодно“.

Апликацијата, како што е очекувано, веднаш беше критикувана и дефинирана како вознемирувачка.

Апликацијата „Slim Booth“ им дава можност на младите да го променат обликот на своите очи, уши и брада за да изгледаат послабо или како своите омилени славни личности.

Креаторите дури и ја појаснуваат својата апликација преку пример со мало русокосо девојче кога ќе се вклучите на iTunes и тврдат дека можат да ја употребуваат и деца кои се веќе над 4 години.

Понатаму продолжуваат:

„Дали сте љубопитни зошто некои славни имаат брада во облик на буквата V или поголеми очи од претходно?

Дали се прашувате дали и вие би изгледале поубави и позгодни, ако имате послабо лице и поголеми очи? Што е со вашите соученици?

Нема потреба од пластични операции, апликацијата ќе ви заштеди пари и време!“.

Добротворните организации кои се борат против нарушувањата во исхраната како булимијата и анорексијата, веднаш реагираа:

„Децата почнуваат да се грижат за својот изглед уште на седум години, а токму на оваа возраст се бомбардираат со таканаречени „идеални“ нереални слики.

Ваквата апликација придонесува во креирање на анксиозност и намалување на самодовербата кои можат да доведат до појава и на нарушување во исхраната.

Децата треба да бидат учени да го прифаќаат сопствениот изглед и да ги слават своите потенцијали и способности.

Оваа апликација може само да наштети“.

Н. Г. | Црнобело