69-годишен Холанѓанец покрена судски процес за да си ги намали годините на 49

Детали

петок, 23 ноември 2018

Вели дека годините го ограничуваат во потрагата по работа и љубов и дека навистина се чувствува 20 години помладо од што е.

Мотивацискиот говорник и телевизиска личност Емил Рателбенд (69) од Холандија, кој е познат како „гуру на позитивноста“ вели дека се чувствува 20 години помладо од неговата реална возраст и дека поради годините е дискриминиран на апликациите за состанување, па сака да си ги „намали“ годините.

Пред судот изјавил дека не се чувствува комфорно околу својот датум на раѓање. Вели дека годините не му влијаат на емоционалната состојба и сака датумот на раѓање да си го промени од 11 март 1949 на 11 март 1969.

„Кога имам 69 години се чувствувам ограничено, а ако имам 49 години можам да купам нова куќа, да возам поинаков автомобил, можам да работам повеќе. Кога нa апликацијата за состанување Tinder ќе кажам дека имам 69 години не добивам повратен одговор, кога ќе кажам дека имам 49 години, со лицето кое го имам, ќе бидам многу подобро прифатен.“

На суд тој бил запрашан како би се чувствувале неговите родители што 20 години од неговиот живот би биле избришани и дека ќе ги мачат прашањата „За кого тие се грижеле? Кое било тоа мало момче тогаш?“.

Емил изјавил дека неговите родители се мртви и дека доколку судот го прифати неговото барање подготвен е да се откаже и од пензијата.

Сака да посочи дека кога веќе законски може да си го смените името и полот, зошто да не може и годините, за тие да рефлектираат колку старо навистина се чувствувате?

Пресудата сè уште не е донесена, а неговиот потег го привлече вниманието на светската јавност.

Годините се само бројка или... ?

 

С. С. | Црнобело