Жена-херој: Помогнала да се раскинат 850 бракови со малолетни девојчиња и ги вратила назад во училиште

Детали

недела, 07 јули 2019

Нејзиното име е Тереза Качиндамото, а таа работи во областа Дедза во централниот дел на Малави. Тереза практично „држи“ 900.000 луѓе во своите раце и не се плаши да го употреби својот авторитет кога станува збор за малолетни девојчиња кои се заробени во бракови со постари мажи против нивната волја.

Во последните 3 години Тереза помогнала да се раскинат повеќе од 850 вакви бракови и вратила стотици девојчиња во училишните клупи за да го продолжат своето образование. Таа се обидува да ѝ стави крај на лошата практика која во држави како Малави подразбира учество на 7-годишни девојчиња во кампови каде што постои сексуална едукација и подготовка за нивните бракови.

Повеќе од половина од девојките во Малави се мажат пред да наполнат 18 години, но според Извештајот на Обединетите Нации, заложбите на Тереза ја прават витален сојузник во борбата против малолетните бракови и правата на жените и децата.

Иако минатата година во Малави се изгласа закон со којшто девојките не смеат да се мажат пред да наполнат 18 години, со согласноста од родителите оваа традиција продолжува.

Кога дел од нејзините машки колеги ги одобриле овие бракови, таа ги суспендирала од работните обврски и ги натерала да ги раскинат склучените бракови, а девојките биле вратени во училиште.

Тереза исто така бара од Владата на Малави повторно да се зголеми старосната граница за стапување во брак на минимум 21 година. Во овој дел од светот девојчињата се најчесто „продадени“ во вакви бракови со постари луѓе со цел да им се олесни товарот со финансиските проблеми.

Една од пет девојки во Малави е жртва на сексуална злоупотреба. Еден од 10 луѓе е заразен со ХИВ. Тереза продолжува да им се заканува на сите кои ги одобруваат малолетните бракови со зборовите дека ќе бидат казнети и избркани од работното место.

Таа вели дека ќе продолжи да се бори за правата на жените и децата или со нејзините зборови: „Доколку се образовани, може да бидат и да имаат сè што ќе посакаат“.

(О)Милена | Црнобело