Пример што треба да се следи - Женските хигиенски продукти ќе бидат бесплатни во Шкотска

Детали

четврток, 27 февруари 2020

Според истражувањата во Велика Британија, 15% од жените и девојките не можеле да си дозволат да купат хигиенски продукти. Процентот кај нас е сигурно поголем.

Истовремено, истражувањето открило дека девојките на возраст од 14 до 21 година, всушност се срамат од нивната менструација.

Ова истражување само го потврдува фактот дека сиромаштијата и стигмата околу женскиот менструален циклус се сериозен проблем. Но, токму поради тоа, Шкотска донесе навистина добра одлука.

Имено, во целата држава, женските продукти за хигиена, како влошки и тампони, ќе бидат бесплатни.

Законот за бесплатни хигиенски продукти за жени беше претставен од Моника Ленон, а ако стапи на сила, власта ќе се осигури дека сите жени и девојки ќе ги добијат потребните продукти.

Ова ќе ја направи Шкотска првата држава во светот што донела ваква одлука.

Во Шкотска, жените во просек трошат околу 8 фунти за влошки и тампони, сума што е превисока за оние со ниски плати.

„Ова не се луксузни продукти. Тие се неопходни и никој во Шкотска не треба да биде лишен од продукти за менструација“, изјави Моника Ленон.

Ова не е првпат Шкотска да се погрижи за девојките и жените на овој начин. Пред две години, женските продукти за хигиена станаа бесплатно достапни во училиштата, колеџите и универзитетите. Власта одвоила 5,2 милиони фунти за оваа цел.

И други држави се обидуваат да ги направат овие продукти подостапни, така што ги ослободуваат од данок, или барем го намалуваат цените. Овде спаѓаат неколку држави во САД, но и Канада, Австралија, Уганда, Јамајка, Тринидад и Тобаго.

Што мислите, дали ова е нешто што треба да се примени и кај нас, барем за жените од посиромашни семејства? Дефинитивно одлична идеја!

Спирова С. | Црнобело