„Се тестиравме за корона вирус и откривме дека сме позитивни“ - Том Хенкс и сопругата во карантин во Австралија

Детали

четврток, 12 март 2020

Во среда навечер, Том Хенкс изјави дека тој и сопругата Рита Вилсон почувствувале симптоми на корона вирус.

Подоцна актерот сподели дека и двајцата имале позитивни резултати на тестовите за COVID-19.

„Здраво луѓе. Рита и јас сме во Австралија. Се чувствувавме малку уморно, како да имавме настинка, и чувствувавме некаква болка во телото. Рита имаше слаба треска што проаѓаше. За да одиграме по правилата, како што треба да правиме сега низ цел свет, се тестиравме за корона вирус и откривме дека сме позитивни“, напиша актерот во објавата.

63-годишниот актер кажа и дека тој и Рита ќе бидат во карантин додека се лекуваат.

„Па, сега. Што да се прави следно? Медицинските лица имаат протоколи кои мора да се следат. Ние ќе бидеме тестирани, набљудувани и изолирани сè додека има потреба од тоа.“

На крај, Том им посака на фановите да се грижат за нивното здравје.

Според изворите, парот бил во Австралија, но двајцата имале разни обврски. Том работи на засега неименуван филм за Елвис Присли, а Рита била на турнеја.

Пред Том да ги сподели новостите, од Warner Bros. доставија соопштение до јавноста:

„Дознавме дека член на тимот што работи на филмот за Елвис има COVID-19. Соработуваме со здравствените агенции во Австралија за да ги идентификуваме и контактираме сите кои имале директен контакт со личноста.

Здравјето и безбедноста на членовите на нашата компанија ни се секогаш приоритет и ги преземаме мерките за да ги заштитиме сите кои работат за нас ширум светот. Личноста со COVID-19 моментално се лекува.“

Спирова С. | Црнобело