„Луѓе ми плаќаат 5.000€ да се појавам на нивниот погреб за да откријам мрачни тајни или да пренесам порака на саканите“

Детали

четврток, 21 август 2025

„Во името на една старица пред ужалените кажав дека таа не му е мајка на нејзиниот син, туку баба, а дека жената за која цел живот верувал дека му е сестра, е мајка му. Еден маж бараше да проверам убаво дали е мртов пред погребот зашто секогаш се плашел дека може да биде закопан жив“ - раскажува Бил Едгар за својата работа.

Австралиецот Бил Едгар за себе вели дека е „Исповедник на погреби“, професија која најверојатно ја има само тој во целиот свет.

Неговата задача е да се појави на нечиј погреб и пред ужалените роднини и пријатели да открие некоја тајна што починатата личност ја чувала во себе или да пренесе порака.

За оваа своја услуга, тој наплаќа околу 5.000 евра, а не „работи“ само во Австралија, туку оди во различни делови од светот да ги пренесе последните зборови од покојникот.

Во разговор за Metro.co.uk, Бил открил дека е (поранешен) приватен детектив и дека оттука и почнала целата приказна за „Исповедникот на погреби“ (Coffin Confessor).

Првиот клиент го имал во 2018 година, маж кој умирал од рак на панкреасот, а кој се сомневал дека сопругата го изневерува со најдобриот пријател.

„Разговаравме за животот и тогаш рече дека би сакал сите да знаат за неверството на неговите двајца најблиски луѓе, но дека никој не би му поверувал ако каже ‘од оној свет’.

Му реков дека јас можам да упаднам на погребот и да ја пренесам пораката. Го кажав тоа на шега.

Но, кога по мојата истрага обезбедив докази за неверството за коешто бев ангажиран, мажот ме замоли да отидам на погребот, да го прекинам говорот на најдобриот другар, да му кажам да оде*е и да ја откријам аферата.

Ми плати за услугата и јас навистина направив скандал на погребот, го прекинав говорот на пријателот по 2 минути, и откако го прочитав писмото од мојот клиент, тој избега засрамен“, раскажува Бил.

Тој вели дека уште не бил заминат од погребот, кога му пришла жена и му рекла дека мора да се види со тетка ѝ.

И додека чекал и размислувал што ќе донесе средбата со жената, самиот си се пошегувал со себе дека од пред ковчегот на починатиот може да пренесе бројни недокажани пораки.

Досега имал преку 50 клиенти, кои од него барале чудни работи - да стави работи во нивниот ковчег пред погребот, да најде скриени работи во нивниот дом за да не ги најде фамилијата, да им однесе подароци на живите од името на починатиот за да одбележат некој важен датум.

„Еден маж бараше да проверам убаво дали е мртов пред погребот зашто секогаш се плашел дека може да биде закопан жив.

Во името на една старица пред ужалените кажав дека таа не му е мајка на нејзиниот син, туку баба, а дека жената за која цел живот верувал дека му е сестра, е мајка му“ - додал тој.

Во пораките кои ги пренел, Бил во името на починат маж признал дека е син на гангстер, за друг открил дека е крадец на автомобили, за трет дека служел затворска казна.

Но, одел и на погреби на кои не се појавувал никој.

„Жена која се самоуби бараше од мене да отидам на погребот и да пренесам порака на нејзиниот син и поранешен сопруг.

Никој не дојде на последното испраќање, па ми требаше време да ги најдам.

Кога им кажав зошто сум таму, ми рекоа дека требала да се убие порано и не сакаа да ги слушнат нејзините последни зборови“ - вели тој.

 А. Ј. | Црнобело