Денес НАСА го лансираше роверот Perseverance кој ќе бара траги од живот на Марс

Детали

четврток, 30 јули 2020

Денес, 30-ти јули, НАСА ќе го лансира роверот Perseverance (упорност), чија дестинација ќе биде Марс.

Роверот ќе има задача да ја истражува планетата, односно кратерот Jezero, кој во минатото бил езеро, со цел да најде какви било знаци за фосилизирани микроби.

Ова лансирање е дел од програмата на НАСА со која сакаат да испратат екипаж до планетата. Според програмата, до 2024-та на Месечината ќе се испратат маж и жена, кои ќе го поплочат патот до Марс за другите астронаути во иднина.

Роверот кој тежи 1.043 килограми се очекува да стигне на својата дестинација на 18-ти февруари следната година, а ќе собира информации, но и примероци од почвата во случај да биде вратен на Земјата. Со овие информации, научниците сакаат да откријат дали црвената планета има потенцијал да поддржува живот.

Дестинацијата на роверот на Марс

Уште поинтересно е што во склоп на мисијата, астронаутите ќе се обидат да управуваат и со хеликоптер кој ќе се наоѓа на Марс. Хеликоптерот е наречен Ingenuity, а неговото управување од Земјата ќе биде прв ваков подвиг.

Со роверот ќе бидат лансирани и три чипови на кои се наоѓаат имињата на над 10 милиони луѓе, кои се приклучија на иницијативата Send Your Name to Mars (испрати го твоето име на Марс).

Претходно, пред речиси 9 години, НАСА го лансираше роверот Curiosity на Марс, а Perseverance,пак, ќе биде најнапредниот робот што бил испратен на црвената планета.

Роверот ќе биде лансиран од Флорида, а според експертите, временските услови се погодни и има можност од околу 80% лансирањето да се одржи денес. НАСА веќе еднаш го одложи лансирањето на роверот поради технички проблеми.

Од НАСА велат дека оваа година периодот на лансирање е околу две недели – од 30 јули до 15 август, бидејќи тој период Марс е во поволна положба во однос на Земјата. „Прозорецот“ за лансирање е отворен околу два часа секој ден, а првиот обид ќе биде денес.

Лансирањето можете да го седите и во живо:

Како изгледаат подготовките за лансирањето:

• 
• 
• 
• 
• 
• 
• 
• 
• 
• 
• 
• 
• 
•  

Спирова С. | Црнобело