81-годишен дедо ѝ свирел серенади под болничкиот прозор на сопругата, во последните мигови од животот (видео)

Детали

вторник, 01 декември 2020

Тој не можел да ја посети сопругата која ги минувала последните денови во болница, па под прозор ѝ свирел серенади и нејзините омилени песни - колку е голема оваа љубов? Емотивно видео кое ќе допре до сечие срце...

Пандемијата нè оддалечи од нашите сакани, но ситуацијата е уште полоша за оние кои немаат можност да ги поминат ни последните мигови од животот со своите најблиски.

Во слична положба бил и 81-годишниот Стефано Боцини од Италија, чија сопруга ги минувала последните денови од животот во болница. Поради пандемијата, Стефано не можел ни да ја посети, но ова не го спречило да ѝ покаже колку ја сака.

Стефано седнал под прозорецот од собата на сопругата Карла и на хармоника ѝ свирел љубовни песни. Тој ги свирел омилените песни на Карла, а неговиот син направил и видео од емотивниот настап.

На почетокот од ноември, синот на Стефано – Маурицио Боцини – му го испратил видеото на еден пријател кој, пак, го објавил на Facebook. Видеото брзо се прославило низ Италија и скоро секој што го изгледал бил воодушевен од гестот на Стефано.

.2832340497043906/2832340390377250/

За жал, кон крајот на минатиот месец Карла починала на 74-годишна возраст, а била погребана на 28-ми ноември. Но, видеото со серенадата е толку емотивно, што кратко по смртта на Карла се огласила и градоначалничката на Пјаченца – град во непосредна близина на гратчето каде што живее Стефано. Таа била толку трогната од целата ситуација, што објавила фотографија од Стефано и сопругата изјавувајќи:

„Приказната на Стефано и неговата сопруга Карла го обиколи светот. Во серенада под болничкиот прозорец сите ја препознаваме љубовта“.

Градоначалничката Патриција Барбиери го искористила моментот да му се заблагодари на Стефано:

„Ти благодарам господине Стефано за тој сладок гест што нè потсети колку е важна љубовта. Да направиш сè за другата личност да не се чувствува сама, да ја надминеш секоја пречка“.

На крај, таа вели дека музиката на Стефано допира до сите нас и неговиот гест ќе се помни уште многу долго, а ќе ни служи и како пример.

Спирова С. | Црнобело