Домот во Малта каде што Филип и Елизабета ги поминаа најсреќните години од животот ќе биде претворен во музеј (фото)

Детали

вторник, 20 април 2021

Пред Елизабета да седне на кралскиот трон, таа и Филип живееја во Малта, а токму овде имаа можност да го искусат нормалниот живот, како најобичен брачен пар. За нив, ова биле најубавите години од животот, а сега, во чест на принцот, вилата во којашто живееја ќе биде претворена во музеј.

Во близина на главниот град на Малта, Валета, се наоѓа вилата Guardamangia, каде што принцот Филип и кралицата Елизабета ги поминаа најсреќните години од нивните животи.

Филип и Елизабета живееја во вилата неколку години, кратко откако стапија во брак. Сега, пак, во чест на Филип, вилата ќе биде реновирана и претворена во музеј.

Куќата е изградена во 18-иот век и денес е празна, но властите ќе ја реновираат и во неа ќе изложат експонати кои ќе ја претставуваат врската помеѓу Малта и Велика Британија.

Исто така, дел од ентериерот на првиот кат ќе биде уреден исто како што бил во периодот 1949-1951, кога Филип и Елизабета живееја таму.

Кралскиот пар се всели во куќата две години после нивната венчавка во 1947, пред Елизабета да седне на кралскиот трон. Токму поради ова, во Малта тие ја имаа единствената можност да уживаат во нормален живот, како „обичен“ брачен пар.

Овде Филип и Елизабета можеле да се забавуваат кога и да посакаат, да одат на пикник, слободно да шетаат, а наводно, Елизабета дури овде првпат отишла на фризер како секоја жена.

Додека идната кралица имала време за прошетки и пазарење како „најобична“ жена, тој период Филип беше дел од морнарицата – неговата кариера од соништата која мораше да ја напушти кога Елизабета го наследи тронот.

За властите и жителите на Малта, оваа вила е национално богатство и со задоволство ќе ја претворат во музеј во чест на Филип, бидејќи принцот често изјавуваше дека Малта има посебно место во неговото срце.

Спирова С. | Црнобело