Жена од САД случајно фрлила грепка со добивка од 1 милион долари - продавачите ѝ ја вратиле

Детали

вторник, 08 јуни 2021

Леа Роуз Фиега од Масачусетс си купила грепка од локална продавница, но бидејќи не забележала дека добивката изнесува 1 милион долари, ја фрлила. Но, сопствениците на продавницата ја покажале својата добрина и наместо да си ја земат, ѝ ја вратиле.

The Guardian пренесува дека Леа Роуз Фиега од Масачусетс платила 30 долари за грепка, од продавница во близина на нејзиното работно место.

„Бев во брзање, на пауза за ручек, па само набрзина ја изгребав грепката, ја погледнав, не ми изгледаше како да има добивка, па му ја дадов на сопственикот на продавницата да ја фрли“, вели Леа.

Цели 10 дена грепката стоела зад касата, заедно со другите грепки без добивка кои требало да се фрлат, а никој од сопствениците не ја ни погледнал. Но, кога Аби Шах, синот на едниот од сопствениците, забележал дека дел од грепката не е изгребан, решил да го изгребе и тогаш сфатил дека добивката изнесува 1 милион долари.

Леа редовно пазарела во продавницата на Аби, па тие добро се познавале.

„Имавме многу измешани емоции. Не можевме да спиеме две ноќи. Но, мојот внатрешен глас ми рече ’Ова не е правилно. Знаеш кому му припаѓа грепката. Треба да ја вратиш‘. Па, го направив токму тоа“, изјави Аби за the Washington Post.

Аби и неговото семејство

Целото семејство разговарало за ова и кога одлучиле дека мора да ја вратат грепката на добитникот, Аби отишол во канцеларијата на Леа.

„Влезе кај мене во канцеларија и ми рече дека мајка му и татко му сакале да ме видат. Му кажав дека сум зафатена, но тој ми рече дека морам да одам во продавницата. Па, отидов и ми кажаа. Не ми се веруваше. Плачев и ги прегрнав“, открива Леа.

Во јануари годинава Леа се заразила со корона вирусот и речиси го изгубила животот, па вели дека се чувствува како оваа година двапати да добила лотарија. Истовремено, таа им е неизмерно благодарна на Аби и неговото семејство.

„Мислам, кој би направил нешто такво? Тие се прекрасни луѓе, а јас сум дефинитивно благословена“.

Продавницата на Аби ќе добие 10.000 долари од државната лотарија бидејќи ја продале грепката, но Леа вели дека ќе им даде дел од добивката поради нивната добрина. Парите што ќе ѝ останат ќе ги чува за пензија.

Спирова С. | Црнобело