„Никогаш не се откажувајте од соништата“ – Маж од САД докторирал на 89-годишна возраст откако се пензионирал

Детали

среда, 10 ноември 2021

Манфред Стајнер, кој има два докторати од областа на медицината, отсекогаш ја сакал физиката, па откако се пензионирал решил да се врати во училиште и на 89-годишна возраст го добил и третиот докторат.

Манфред Стајнер има 89 години и три докторати од кои третиот го добил оваа година. Пред пензионирање, Манфред работел како професор по медицина, но целиот живот сонувал да учи и физика. Дури во староста нашол време да ѝ се посвети на оваа наука.

„Ова е мојот трет докторат, но го ценам најмногу. Успеав – и тоа успеев на оваа возраст“, вели Манфред кој чекал скоро цел живот да си го оствари сонот.

Манфред пораснал во Виена, а во тинејџерските години ја затекнал Втората светска војна. Уште тогаш сонувал да студира физика, но родителите го советувале да се запише на медицина и тој ги послушал. Сепак, љубовта кон физиката никогаш не згаснала.

„Кога бев студент по медицина во раните ’50-ти, се искрадував во институтот за физика кој беше веднаш до медицинскиот факултет. Таму слушав што си разговараат бидејќи бев многу заинтересиран за квантна физика – гранка што беше релативно нова тој период“.

Манфред вели дека е пресреќен што ѝ го посветил животот на медицината, но смета дека физиката е многу подобра бидејќи сè е точно одредено.

„Законите во физиката се тие, а таа прецизност отсекогаш ме фасцинирала. Во медицината, од друга страна, има многу променливи и многу непрецизност“.

Манфред завршил медицина на Универзитетот во Виена каде што го стекнал и првиот докторат. Набрзо потоа се преселил во САД. Таму се запишал на Институт за технологија во Масачусетс каде што го добил вториот докторат за биохемија.

Следната година, во 1968-ма, тој станал асистент на медицинскиот факултет на Универзитетот Brown, каде што поминал неколку децении од животот. Манфред бил одличен професор и обучувал многу идни лекари, сè до неговото пензионирање во 2000 година.

И покрај успешната кариера, Манфред не ја заборавил физиката, па кога сфатил дека има повеќе време откако е во пензија, решил да ѝ се посвети.

„Штом се пензионирав од медицината и ми наближуваше 70-тиот роденден, одлучив да влезам во светот на физиката“.

Поради влошеното здравје, Манфред запишал само неколку предмети на Институтот за технологија во Масачусетс, а подоцна се префрлил во Универзитетот Brown бидејќи му е поблиску до дома.

Првично воопшто не планирал да докторира, но кога положил доволно испити и собрал доволен број кредити, му се отворила опцијата да се запише и на докторски студиии. 

Само неколку недели пред неговиот 90-ти роденден, Манфред успешно го одбранил докторскиот труд, со тоа конечно остварувајќи си го сонот од детството. Тој вели и дека физиката е одговорна за неговиот бистар ум дури и на оваа возраст.

„Важно е да не ги потрошите залудно деновите од староста. Постарите луѓе кријат мудрост која може да им биде од огромна помош на помладите генерации“.

Следно, Манфред планира да го издаде докторскиот труд, но и да продолжи да истражува.

„Сакам да продолжам да се занимавам со физика сè додека ме држи умот. Ќе направам и истражувања за теоретска физика. За тоа не ми треба лабораторија. Само компјутер и тетратка и молив“.

Манфред има и одличен совет за оние кои помислиле да се откажат од нивните соништа:

„Млади луѓе, ако имате сон, следете го. Не се откажувајте. Ако не успеете, секогаш можете да пробате и нешто друго. Но, најпрво пробајте да го следите вашиот сон“.

Спирова С. | Црнобело