Девојката со ангелски глас што го стопи срцето на Сајмон Кауел ја загуби битката со ракот: „Ќе ја помниме по надежта што ја ширеше“

Детали

вторник, 22 февруари 2022

Ги освои срцата на милиони со својата изведба на America’s Got Talent, а го расплака суровиот судија Сајмон Кауел со својата приказна. Доби златен тастер, но се откажа откако здравјето ѝ се влоши. Џејн Марчевски, позната како Nightbirde ја загуби битката со ракот.

Девојката што го расплака светот со својата тажна приказна за време на настапот на America’s Got Talent, Џејн Марчевски почина во саботата (19.02) на возраст од 31 година, откако претходно се бореше со ракот 4 години.

„Твојот глас, твојата приказна и твојата порака допреа до милиони. Nightbirde секогаш ќе биде член на семејството America’s Got Talent. Почивај во мир“ – стои на официјалниот Инстаграм профил на шоуто.

Џејн отворено говореше за својата битка со ракот, па во една прилика кажа дека еднаш веќе се изборила со рак на дојката, но повторно се вратил.

„Имам два проценти шанси за преживување, но два проценти не се нула проценти. Два проценти се нешто и посакувам луѓето да знаат колку е тоа прекрасно“ – велеше таа.

Благодарение на прекрасниот глас со кој ја изведе нејзината авторска песна I’m OK, таа брзо ја освои публиката, а го доби и златниот тастер од Сајмон Кауел кој со солзи во очите ја слушаше нејзината тажна приказна.

Џејн иако прерано го загуби животот, сепак успеа да го оствари сонот за музичка кариера. Нејзината авторска песна стана огромен хит, а видеото од нејзината изведба беше второ по гледаност на YouTube.

За жал, Џејн мораше да се откаже од настапите во America’s Got Talent откако ѝ се влоши здравствената состојба. Таа сподели порака до своите обожаватели на денот кога започна финалето на шоуто.

„Толку ми е тешко да не бидам на сцената оваа недела. Се обложувам дека никогаш не сте виделе некој што толку силно се бори, но и толку многу губи истовремено. Не требаше вака да заврши приказната“ – рече таа.

Вестите за прераната смрт на Џејн ја соопштија членовите на нејзиното семејство кои рекоа:

„Ние како семејство сме скршени од болка поради нејзината смрт и незамисливата загуба. Многу од вас ја помнат по настапот во America’s Got Talent каде ја изведе песната It’s Ok и инспирираше милиони луѓе во светот со нејзините пораки за надеж и истрајност.

Тие што ја познаваа уживаа во нејзиното големо срце и смислата за хумор. Имаше досетлива шега за секоја пригода – дури и кога се шегуваше на своја сметка. Ќе ја помниме по надежта што ја даде преку нејзината музика и силата што ја наоѓаше во вербата во Бога“ – се вели во соопштението.

Да се присетиме уште еднаш на нејзината изведба:

https://www.youtube.com/watch?v=CZJvBfoHDk0

Б. С. Б. | Црнобело