Маж од Лондон мака мачи со инфлуенсерките – му позираат пред домот, му ги оштетуваат плочките

Детали

сабота, 03 септември 2022

„Не ми пречи што позираат непристојно, но со штиклите ми ги оштетија плочките“ – вели овој 77-годишен маж од Лондон, чија влезна врата е едно од омилените места за сликање на Инстаграм инфлуенсерките во Лондон.

Светло розовиот историски дом на 77-годишниот Питер Ли од Лондон, кој се наоѓа во близина на Палатата Кензингтон, е едно од омилените места за фотографирање на инфлуенсерките, а овој маж не знаејќи што повеќе да направи својата приказна ја раскажува за британските медиуми.

Како што вели пред неговиот дом секој ден се случува да се фотографираат и по неколку инфлуенсерки, семејства, балерини, а имало и денови кога и цели телевизиски екипи снимале емисии.

Питер во медиумите споделува голем број фотографии од инфлуенсерките направени од безбедносните камери во неговиот дом, а како што вели инфлуенсерките што во високи штикли некогаш скокаат на скалите му направиле огромна штета, затоа што плочките од скалите пред влезната врата се искршени.

Со оглед на тоа што живее во историски дом, Питер Ли ќе треба да прави плочки по нарачка за да ги смени оштетените.

„Модерните плочки се многу тенки и не изгледаат убаво“ – вели Питер.

Инаку, Питер, кој во минатото работел во модната индустрија, вели дека сака да внимава на сите детали од неговиот дом, а новите плочки ќе го уништат автентичниот стил.

Питер веќе има голема колекција со видео снимки од инфлуенсерки кои некогаш и непристојно позираат пред неговата влезна врата, а тој сето тоа го гледа од камерите за обезбедување:

„Воопшто не ми пречи, ако не прават штета. Понекогаш е забавно да ги гледам како се фотографираат“ – вели тој.

Во продолжение погледнете неколку фотографии уловени од камерите во домот на Питер:

 Б. С. Б. | Црнобело