Девојче кое се родило на 5 и пол месеци со само 8% шанси да преживее - денес има 2 години и е „медицинско чудо“

Детали

понеделник, 16 јануари 2023

Малата Исла Тобијас од Англија била родена на само 24 недели, а три недели откако се родила ѝ била направена ризична операција. Иако имала само 8% шанси да преживее, таа се изборила и денес е среќно девојче кое иако има проблеми со здравјето, барем е надвор од животна опасност.

Исла Тобијас, која денес има две години, била родена предвремено – на 24 недели, односно едвај пет и пол месеци.

Според лекарите, нејзините шанси за преживување биле од 8% до 10%, но денес Исла е „медицинско чудо“ и е пресреќно 2-годишно девојче.

Исла се родила во 2020 година и тежела само 558 грама. Не можела да дише сама, па веднаш била ставена во инкубатор и на машина за дишење.

Бидејќи не можела ни да јаде, лекарите морале да ѝ стават цевка преку која ќе ја хранат, а овој зафат можел да заврши трагично.

Цевката ѝ нанела сериозни повреди, па уште пред да наполни три недели, малото девојче морало да оди на операција.

И покрај минималните шанси, Исла се изборила за живот и по 140 дена во болница, била испратена дома.

Сепак, поради состојбата, малото девојче постојано било под надзор на 13 различни специјалисти.

Исла и сега има проблеми со здравјето – има нарушување поради кое во нејзиниот организам не се лачи доволно од хормонот стероид, а има и мала дупка во срцето – на барем е надвор од животна опасност.

Поради ова, мајка ѝ постојано внимава на неа, а редовно ја прегледуваат и неколку специјалисти.

Мајката на Исла, 28-годишанта Јасмин, вели дека во текот на бременоста не чувствувала речиси никакви симптоми, а и самата бременост била без проблеми.

„Сè беше во ред. На прегледите не се појавија никакви проблеми“.

Јасмин вели дека нема причина зошто се породила предвремено, освен тоа што можеби Исла била „подготвена порано да дојде на овој свет“.

Младата мајка се присетува дека кога почнале породилните болки, била многу исплашена. Таа била во тоалет кога забележала крв, по што сопругот Трој веднаш викнал брза помош.

„Лекарите ми кажаа дека се породувам, дека имам контракции и дека не можат да направат ништо освен да ме надгледуваат за да видат дали ќе ја родам Исла. Следното утро потпишав согласност за царски рез бидејќи природното породување повеќе не беше опција“.

Лекарите им рекле на Јасмин и Трој дека постојат големи шанси Исла да не го преживее породувањето.

„На Трој му кажаа дека има 25% шанси да си замине од болницата или без мене, или без детето“, открива Јасмин.

За среќа, породувањето поминало добро.

„Денес Исла е овде, живо медицинско чудо. Горди сме на нејзиниот напредок, особено кога ќе се земе предвид нејзиниот тежок почеток“.

Во знак на благодарност на тимот лекари кој го спасил животот на Исла, Јасмин и Трој секоја година организираат настан со кој собираат донации за нивниот оддел и тамошните пациенти.

Досега имаат собрано над 5.000 долари, а овие пари се користат за играчки и облека за бебињата кои се во болницата.

„Бескрајно сме благодарни на лекарите, медицинските сестри и хирурзите кои направија многу за 140-дневниот престој на Исла во болницата“, вели парот.

Јасмин и Трој се надеваат дека нивната приказна ќе им даде надеж на другите родители во иста положба.

„Како родители, сакаме да им кажеме на другите родители кои минуваат низ истото да бидат силни. Вие сте тим и на ова патување треба да бидете овде едни за други. Важно е никогаш да не се откажете“.

Спирова С. | Црнобело