Баз Олдрин, вториот човек кој стапна на Месечината, се венча на 93-иот роденден со 30 години помлада жена

Детали

сабота, 21 јануари 2023

Баз Олдрин, попознат како вториот човек кој стапна на Месечината во 1969-та, се венча на својот 93-ти роденден, и тоа по четврти пат, а неговата сопруга е цели 30 години помлада од него.

Баз Олдрин, астронаутот кој заедно со Нил Армстронг стапна на Месечината во 1969 година, на својот 93-ти роденден се венча по четврти пат.

Олдрин, кој го прослави роденденот во петокот, 20-ти јануари, ги сподели новостите на Твитер.

Неговата сопруга – Анка Фаур – има 63 години, а парот е заедно подолг период.

„На мојот 93-ти роденден и на денот на кој исто така ќе бидам почестен од Живите легенди од авијацијата, со задоволство споделувам дека мојата долгогодишна девојка, доктор Анка Фаур, и јас стапивме во брак.

Се венчавме со мала приватна церемонија во Лос Анџелес и сме возбудени како тинејџери“, пишува астронаутот.

Сопругата на Олдрин работи во неговата компанија – Buzz Aldrin Ventures LLC – од 2019 година и е доктор на науки во областа на хемиското инженерство.

Ова е четвртиот брак на Олдрин, кој претходно беше венчан со Џоан Ан Арчер, Беверли Ван Зиле и Лоис Дригс Канон. Тој има и три деца од првата сопруга.

Баз Олдрин е познат по историското патување до Месечината во 1969 година со мисијата Аполо 11.

Тој е вториот човек кој стапна на Месечината, по астронаутот Нил Армстронг.

Олдрин се пензионира од НАСА во 1971 година, а потоа основа своја непрофитна организација насочена кон истражување на вселената.

Иако Олдрин го доживеал сонот на многу деца, па и возрасни, по патувањето до Месечината минувал низ тежок период.

Имено, астронаутот повеќе не знаел што да прави со себе, па долг период страдаше од депресија и алкохолизам.

Но, тој е трезен повеќе од 40 години и сега изгледа навистина среќно.

Спирова С. | Црнобело