Дедо (72) од Италија 50 години живее без струја и водовод - си го оставил семејството, сам одгледува зеленчук

Детали

вторник, 24 јануари 2023

Фабрицио Кардинали речиси 50 години живее во колиба без струја, водовод и канализација бидејќи не му се допаѓало во која насока се движи цивилизираниот свет. Тој има двајца „цимери“ со кои одгледува овошје и зеленчук, a прави и брашно и маслиново масло. Фабрицио вели дека во петте децении, ниту еднаш не се покајал за овој начин на живот, дури ни во тешките периоди.

Фабрицио Кардинали од Италија има 72 години и веќе неколку децении живее настрана од цивилизацијата, без струја, без плин и без водовод и канализација.

Фабрицио живее во стара куќа, сместена во шума во близина на источниот брег на Јадранското Море во Италија.

Додека повеќето сигурно не би го избрале овој начин на живот, Фабрицио вели дека не би го менувал за ништо. Порано тој работел како полицаец, а извесен период играл и одбојка.

„Не сакав да бидам дел од светот поради насоката во којашто сте движеше. Па, оставив сè – семејство, факултет, пријатели, спортски тим, и тргнав во потполно различна насока.

Откажувањето од нешто не е мазохизам. Се откажувате од нешто за да добиете нешто друго што е поважно“, открива Фабрицио за телевизијата WION.

Додека порано Фабрицио живеел потполно сам во неговата колиба, сега има двајца „цимери“ – Агнес (35) и Андреа (46).

Тие имаат и петел, три кокошки, како и мачка.

Фабрицио, Агнес и Андреа имаат шпорет на дрва што го користат за готвење и затоплување на куќата. За осветлување користат ламби што ги напојуваат со масло за готвење.

Тие одгледуваат овошје и зеленчук, имаат пчели за производство на мед, а имаат и неколку маслинки за производство на маслиново масло.

Од локална продавница купуваат мешунки, но и жито од кое самите си прават брашно и леб.

Кога имаат можност, тие ги разменуваат намирниците што ги произвеле за храна и предмети што им требаат.

Одвреме-навреме Фабрицио ги посетува пријателите кои живеат во близина, а некогаш пешачи до најблискиот град за да се дружи со локалците и да оди на лекар.

Андреа, пак, секој викенд го поминува со мајка му, а потоа се враќа во колибата.

Фабрицио има и одличен совет за оние кои сакаат да ѝ се доближат на природата:

„Фрлете го таканаречениот паметен телефон. Живеам на овој начин речиси 50 години и не сум зажалил ниту еднаш.

Секако, имало и тешки периоди, но никогаш не ме натерале да помислам дека направив погрешна одлука што оставив сè зад мене“.

Спирова С. | Црнобело