90-годишен маж секој ден вози 17km со велосипед за да ја види болната сопруга: „Само сакам да ѝ го слушнам гласот“

Детали

вторник, 14 февруари 2023

90-годишниот Питер од Холандија секој ден вози по 17 километри со велосипед за да ја посети сопругата која престојува во дом за болни лица. Тој вели дека ќе направи буквално сè што треба, само за да помине повеќе време со неа.

Питер Буркард од Холандија има 90 години, но возраста не го спречува секој ден да вози по 17 километри со велосипед за да ја види својата сопруга.

Сопругата и Питер се заедно 63 години, а таа живее во дом за нега на болни лица.

Цели седум години, Питер не поминува ниту еден ден без да ја посети сопругата и скоро секојпат оди со велосипед.

Вели дека му треба околу еден час за да стигне до болницата, но кога има силен ветар, патувањето може да трае и подолго.

Ни дождот ни студеното време не го спречуваат Питер да ја посети саканата - во зима, тој само облекува потопла облека, а ако има дожд, носи мантил.

„Студот не ми пречи, а кога врне, можете да облечете мантил за дожд. Па, секогаш одам да ја посетам сопругата. Сакам да бидам со неа секој ден.

Не можам да издржам кога ми недостасува. Претходно одев со автомобил, но сега одам само со велосипед“, открива Питер за холандски медиум.

Питер открива дека дури и да сака да оди со автомобил, нема да може поради возраста и фактот дека долг период нема автомобил.

Сепак, ако временските услови се многу лоши, тој вика такси или го носи некој од неговите синови.

„Секогаш стигнувам до сопругата“.

А, неговата сопруга не ни знае дека тој доаѓа со велосипед. Питер не открива конкретно, но најверојатно сопругата има проблеми со сеќавањето поради здравствената состојба.

„Таа навистина не знае. Но, кога ќе дојдам, забележувам дека ме прегрнува понекогаш“.

90-годишниот старец вели дека ќе направи сè во негова моќ за да минува што повеќе време со саканата.

„Сакам да ја видам, сакам да ѝ го слушнам гласот. Кога ќе влезам во домот, веднаш знам каде е. Таа не е иста како порано, но јас уште сум вљубен во неа“.

Спирова С. | Црнобело