Добра вест за сите кои мразат животинска кожа и крзно - Хуго Бос дизајнираше вегански патики

Модниот бренд Хуго Бос лансираше линија на вегански машки патики направени од природен материјал изработен од лисја од ананас, наречен Pinatex, како замена за кожа.

Горниот дел од патиките без суровост е изработен од материјал добиен од лисја од ананас, којшто е направен без никакви животински продукти и е обоен со помош на растителни бои.

Патиките имаат ѓон од рециклиран термопластичен полиуретан и се достапни во црна, сина, портокалова и жолта боја.

Покрај тоа што се вегански, патиките се дизајнирани да имаат минимално влијание за животната околина, па така тие доаѓаат во кутија којашто може да се рециклира и е биоразградлива, а е исто така изработена од 100% рециклирана хартија.

Материјалот Pinatex се добива како нуспроизвод од постоечката растечка индустрија на производство на ананас. 

За разлика од кожарската индустрија, којашто користи многу вода и хемикалии, Pinatex им овозможува на фармерите на ананас да заработат од остатокот од производот, којшто инаку би го фрлиле.

(О)Милена | Црнобело