Зошто на врвот од новогодишната елка ставаме ѕвезда?

Китењето елка е христијански обичај кој потекнува уште од дамнешни времиња, но сигурно се прашувате зошто на врвот од елката најчесто стои ѕвезда.

Прочитајте ја оваа руска бајка и откријте го одговорот на таквата енигма.

Кога се родил Христос, ѕвездата на небото ги водела мудреците од Истокот, покажувајќи им го патот до пештерата во која се наоѓале Богородица и Христос. Над пештерата во која е Христос роден, растеле 3 дрва – бор, кедар и ела.

Дрвата биле осветлени од светлоста на Христовото раѓање, па посакале да му подарат нешто.

Кедарот ги затресол своите гранки и пред пештерата паднале иглички кои ширеле прекрасен мирис, борот ги испуштил најубавите шишарки, а елата горко заплакала, затоа што таа немала ниту мирисни масла во своите иглички, ниту шишарки.

Солзите на елата ги видела ѕвездата - водилка, па се сожалила.

Поради нејзината голема желба да му поклони нешто на Христос, ѕвездата не ѝ дозволила на елата да биде тажна таа ноќ.

Ѕвездата - водилка испратила малечка ѕвезда да се спушти на врвот од елата. Тогаш, таа засветкала со голема светлина и длабоко поклонувајќи се, ѕвездичката се спуштила токму пред пештерата каде во јаслите на сламата лежел Христос.

Затоа денес на врвот од елката најчесто се става ѕвезда – како знак и искажување љубов кон Исус Христос.

С. С. | Црнобело