Омилени македонски детски книги кои ќе ве вратат во детството

Големи и мали – Бошко Смаќоски

Диме-Такси кој ги дочекува сите на почетокот на улицата Караорманска, младиот студент Стево кој живее под кирија кај тетка Донка, чиј син Раде е вљубен во Буба, онаа Буба на Важната и чичко Милан кој им ги дупнува топките на дечињата... невозможно е да не ја сакате оваа преубава детска книга од Бошко Смаќоски, според која има снимено и тв серија.

Дружината братско стебло – Јован Стрезовски

„Целата училница клокоти и врие. Јас вртам цртеж и го гледам: и право и отстрана, но никако не ми оди од рака, споредувам, но лицето не е како на учителката. Особено носот“.

Икслучително смешна и тажна приказна истовремено, за животот на група дечиња кои ќе го врежат името на својата група во едно дрво, сведок на нивното постоење.

Бојан – Глигор Поповски

Бојан е македонската Хајди. Тоа би бил најсоодветниот опис за оваа детска книга и храбриот Бојан кој ќе мора да остане сам да се грижи за колибата и стоката на својот дедо на планината Грамадна.

Тој ќе мора да помине неколку тешки препреки – снегот на планината, нападот од волците, неговата болест... како Бојан ќе се справи со сето тоа?

Волшебното самарче – Ванчо Николески

„Волшебното самарче“ е роман-темелник во македонската детска литература. Тој отсликува неверојатна приказна и нè учи колку децата може да бидат храбри и пожртвувани кога се работи за татковината и слободата.

Дрварчето Трајче со своето коњче Дорчо ќе остане засекогаш во вашите сеќавања, како и качамакот зготвен во војнички шлем.

Силјан Штркот – Марко Цепенков

Приказната која започнува во селото Мало Коњари го следи разгалениот и непослушен Силјан, кој го стигнува родителската клетва и завршува во чудната земја на штрковите, осамен и тажен.

На еден особено интересен начин се претставени созревањето, преобразбата на еден млад човек и значењето на семејството, традицијата и домот.

Девојчето со две имиња – Јадранка Владова

Малата Неда е приморана да се раздели од својата мајка и сестричката поради разводот на родителите. Нејзината приказна од Скопје се сели во Прага. Исткаена со многу авантура, прекрасна поука и описи, „Девојчето со две имиња“ несомнено ќе ви измами неколку солзи.

Белото циганче – Видое Подгорец

Баба Мулон го пронаѓа Таруно, момче напуштено од своите родители за време на војната и тоа станува дел од тајфата Роми кои живеат под отворено небо и постојано се селат, преживувајќи од трудот на своите две раце. Емотивна приказна со живописни описи и многу прашања за размислување.

Калеш Анѓа – Стале Попов

Храбрата Калеш Анѓа која најмногу од сè го цени своето потекло, традицијата и своето огниште е најдобар илустратор за противењето на македонските девојки против потурчувањето, нивната самосвесност за соптвениот идентитет.

Ова е просто задолжителна лектира за македонската историја.

(О)Милена | Црнобело