На 30 го фати последниот воз, на 40 си стара мома – двојните аршини кои ја печат женската кожа

Неодамна влетав во една дискусија на Фејсбук каде што се зборуваше за рамноправноста на женскиот и машкиот пол во Македонија. Имено, алфа-мажјакот нè убедуваше како не гледал никаков проблем на оваа тема, бидејќи времето кога жените биле дискриминирани одамна поминало, а денес дури ни било дозволено и малку повеќе.

Тоа ме натера да размислувам – што е тоа повеќе и кој ни го дозволува? Дали сè уште бараме нечија дозвола и мислење само затоа што сме жени?

Лично гледам сè уште многу двојни аршини кои ја нагризуваат женската еманципација. За почеток, сите оние простачки прашања кои рошкаат по љубовниот живот и интимата на една девојка – кога ќе се мажиш, кога ќе раѓаш, си слушнала ли за билошкиот часовник.

Мажите скоро никој не ги заморува со овие бескрајни прашања, а и кога се прави тоа, процесот е некако мирен, суптилен, дискретен, а за жената е резервиран друг третман – бурен, осудувачки и навредлив.

Треба да си сериозно слеп и глув за да не ги забележиш тие двојни аршини за кои зборувам.

Еве го мажот, женет на:

20 години – Млад е, море алал да му е, храбро момче.

30 години – Таман си е, на време.

40 години – Супер, зрел за брак и одговорности.

50 години – Никогаш не е доцна за среќа така треба.

60 години – Лудо старче, хаха, уште си сака друшка покрај себе.

А еве ги коментарите за одлуката на жената да се венча на:

20 години – Мрсулка, детиште, барем еден факултет да завршеше.

30 години – За влакно го фати последниот воз!

40 години – Стара мома, не ѝ е срам малку?

50 години – Баба требаше да си досега мори, не невеста.

60 години – Ти ма уште си жива?

Вака од прилика тече оваа вистинита тажна приказна. И следниот што ќе изјави дека не забележал полова дискриминација, добро нека размисли пред да проговори.

Еве ја најпростата полова дискриминација: при вработување, жените сè уште се гледаат сомничаво, како секој момент емотивно да ќе се распрснат и расплачат и со своите солзи ќе урнат нечија империја. Како да немаат доволно капацитет, додека мажот од друга страна е силен и доминантен, тој може и да за’ржи.

Да не зборуваме за бремената жена, таа може да е и 10 пати подобра од сите други кандидати, ама немаш среќа госпоѓо – не си посакувана тука. Или пак планираш да основаш семејство – ааа, не ни требаат такви работници, ни треба некој без матка.

Ти раѓај ако ти се раѓа, ама ние ќе те лишиме од правото на работа.

И еве ги последните аргументи за половата дискриминација:

Жена таксист – чудилник, жената-возач на автобус ќе нè испотепа сите, тргај се од патот. Жената полицаец – а има добар задник? Жената со повеќе сексуални партнери е (кажано со еуфемизам) „мераклика“, ама затоа мажот со многу девојки е – фраер.

Со секој сексистички и дискриминирачки коментар кој го упатувате, создавате длабоки рани и ја печете кожата на жената. Воедно, тоа зборува многу за вашата личност и карактер, но и неукост.

Вразумете се што зборувате и почнете да го менувате вашето закоравено мислење. Не е далеку денот кога ќе имате ќерка, па се надевам само дека нема да ѝ ја подарите оваа утопија обвиена со полова рамноправност, во која владее мислењето дека жените уживаат дури и повеќе отколку што е потребно.

©CRNOBELO.com Забрането преземање и копирање. Крадењето на авторски текстови е казниво со закон.

(О)Милена | Црнобело