И во Македонија има мажи домаќини, такви кои домот го претвораат во храм

И во Македонија има мажи за медал. Онакви посветени на домот и семејството.

Организирани. Вредни. Способни.

И знаат да зготват најубаво. И со детето знаат да комуницираат на едно поинакво ниво.

Тие не прескокнуваат обврски, тие не дремат 12 часа на телефон, тие не наоѓаат оправданија, туку решенија за работите и обврските во домот.

Тие не сметаат дека домашните обврски се задолжение на жената.

Не глумат неспособни само за да избегаат од истите.

Тие знаат и да испазарат и да организираат домаќинство и гости да пречекаат.

На пазарче знаат на кои тезги има најсвеж зеленчук, а која тетка продава „најслатко“ овошје.

Одлично располагаат со домашниот буџет, знаат кога е време за штедење, а кога за ѓезме.

И татковството не го сметаат за обврска, туку за задоволство, но онакво задоволство кое само со себе носи и обврски.

Да се однесе детето на дополнителни часови, да се разговара со детето, да се работи на тоа детето да биде најдобрата верзија од себе.

Едноставно да се вложат и последните атоми сила за нивниот наследник/чка да израсне во добар човек.

Не да се кријат во удобноста на каучот, со изјавата мајката е главна и така со слатки комплименти да ѝ ги префрлат сите обврски на неа.

Да, да, оние мажи кои сами му закажуваат докторски преглед на детето и го носат таму и се грижат дали има нова соодветна зимска јакна за годинава и купено резервни капки за нос.

Мажи кои што се цврсти и на кои знаете дека можете да се потпрете во најтешкото.

Мажи кои ќе ви ја дадат потребната доза на смиреност во миговите кога вие паничите и не размислувате трезвено.

Мажи кои гасат пожари кога вам во душата ви гори.

Мажи за кои знаете дека и да ве нема на вашето дете нема влакно да му фали.

Ете, такви мажи!

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело / фото: depositphotos.com