Фасцинантниот живот на првата добитничка на Нобеловата награда - Марија Кири

Животната приказна на полската хемичарка и физичарка Марија Кири е инспирација за генерации жени, кои сè уште се борат за своето место во „машкиот свет“.

Кири е првата жена која освоила Нобелова награда, а ова се неколку детали од нејзиниот живот:

Марија потекнува од скромно семејство кое го ценело образованието. Нејзиниот татко бил професор по математика и физика, сè додека не бил отпуштен заради неговите про-полски политички убедувања. Нејзината мајка била директорка на женски интернат.

Мајка ѝ го напуштила своето работно место кога се родила Марија, а 10 години подоцна, починала од туберкулоза. Истата година, малата Марија била испратена во интернат, а потоа се запишала во женско средно училиште.

Желбата за понатамошно образование, како и љубовта кон физиката и математиката, станувале сé поголеми, но во тоа време, високото образование било резервирано исклучиво за мажи.

Ова било резултат на патријархалните и политичките околности во земјата, но Марија, и покрај тоа, успеала да се запише на универзитетот Latajqcy. Сепак, таа отсекогаш сонувала да замине во Париз и да се запише на престижната Сорбона - нешто што успеала да го направи неколку години подоцна.

Научната кариера ја започнала во 1894 година, со истражување на магнетните својства на челикот, а истата година се запознала со физичарот Пјер Кири. Пријателството засновано врз заедничка страст кон науката полека прераснало во љубов.

Парот се венчал во 1895 година, а на скромната церемонија Марија носела темносин фустан, наместо венчаница, што после го користела за работа во лабораторија.

Парот Кири започнал со научна работа, што во 1903 година резултирала со номинација за Нобелова награда. Комитетот првично имал намера да ја додели Нобеловата награда за физика само на Пјер и неговиот колега Хенри Бекерел за нивното истражување за зрачење.

Но Магнус Густаф Митаг-Лефлер, шведски математичар и борец за женски права во науката, го предупредил Пјер за ова. Па, по неговата жалба, Марија Кири исто така била номинирана и на крајот станала првата жена што ја освоила престижната награда.

Марија Кири денес се слави како една од најважните женски научници на сите времиња и икона на феминизмот.

Ашера | Црнобело