Нема улични кучиња, во домовите нема завеси - Интересни факти за животот во Холандија

Во Холандија нема улични кучиња, најчестиот лекарски совет е „Напиј се парацетамол“, а кога некој слави роденден, морате да им честитате и на гостите.

Холандија е навистина прекрасна држава, а тамошни жители имаат многу интересни обичаи и начин на живот.

Културата на Холанѓаните е на завидно ниво, и сите можеме да научиме по нешто од нив.

Многу луѓе кои потекнуваат од друга држава, а живеат во Холандија раскажуваат за необичните навики на луѓето таму (што не значи дека треба да се генерализира и дека важат секогаш и за секого, но интересно е да се напоменат).

Погледнете неколку такви факти за животот во Холандија:

Чудни родендени

Во Холандија кога на некој му е роденден, не треба да му честитате само нему, туку и на другите гости или луѓето кои се блиски со славеникот. Оваа традиција е стара, но не е точно познато зошто се практикува. Ако добро размислиме, ова се случува понекогаш и кај нас, кога се јавуваме на родителите на славеникот за да го честитаме роденденот на нивното дете и слично.

Најпознат лекарски совет е „Напиј се парацетамол“

Ова е шега која се шири помеѓу „дојденците“ во Холандија, па се раскажува дека кога одите на лекар таму и немате некои сериозни симптоми, најверојатно ќе ви речат само да се напиете парацетамол. Имено, ова бил најчестиот совет што го давале тамошните лекари. Ако парацетамолот не ви помогне, дури тогаш размислуваат за друга терапија.

Сепак, тоа не значи дека ова важи буквално за секаде и за секој случај и не значи дека нивниот здравствен систем е лош, напротив.

Нема улични кучиња

Пред некоја година, Холандија стана првата држава во светот која нема улични кучиња. Ако тамошните жители остават куче или какво било милениче на улица, или ако му нанесат некаква штета, ќе треба да платат многу висока казна.

Еден објект во две држави

Во Холандија има гратче кое е лоцирано на самата граница со Белгија. На улиците границата е обележана само на земјата, а постојат и градби што се наоѓаат врз неа. Па така, овде има домови и објекти кои се наоѓаат и во Белгија, и во Холандија.

Холанѓаните повеќе сакаат да седат дома отколку да одат на забави

Иако многу луѓе одат во Холандија, особено Амстердам, за да се забавуваат, тамошните жители повеќе сакаат да уживаат во удобноста на домот.

Многу супермаркети воопшто не работат до доцна, но во последно време ова се менува, па почесто се среќаваат маркети отворени до 10 навечер. Истото важи и за кафетериите. Во време на пандемија, овие „правила“ се променливи.

Холанѓаните не сакаат да користат завеси

Во Холандија многу домови немаат завеси, а оние кои имаат, постојано се отворени. Можеби за нас звучи чудно, но за тамошните жители ѕиркањето низ туѓи прозорци е многу неучтиво, па никој не го ни прави тоа.

Спирова С. | Црнобело