Од детство во сиромаштија до брак со благородник и успешна филмска кариера – Факти за Џесика Честејн, модерната Пепелашка

„Голем број ноќи си легнувавме гладни и навистина беше тешко“ – откри во една прилика актерката Џесика Честејн. Таа ретко говори за сопственото детство, а нејзината приказна наликува на модерна бајка – факти за актерката што доби Оскар за најдобра женска улога.

Џесика Честејн на црвениот тепих на Оскари 2022 се појави во една од најубавите тоалети, го доби Оскарот за најдобра женска улога во филмот The Eyes of Tammy Faye, а во минатото говореше за своето тешко детство со самохрана мајка и 5 деца.

Џесика во филмот ја играше улогата на Тами Феј Бекер, сопругата на контроверзниот теле-евангелист Џим Бекер.

Денес Џесика е една од најуспешните холивудски актерки, гласен поборник за правата на жените и на LGBT заедницата, а беше мошне активна и со движењето #MeToo.

Во продолжение да проследиме неколку интересни факти за неа, што можеби не сте ги знаеле.

Родителите на Џесика биле тинејџери кога ја добиле, а таа пораснала заедно со нејзината самохрана мајка и подоцна со нејзиниот очув кој работел како пожарникар.

Џесика не сака да говори за својот биолошки татко, но во една прилика откри дека тој починал во 2013-та година.

Џесика има двајца браќа и две сестри, а нејзината помлада сестра Џулиет во 2003-та си го одзела животот, на возраст од 24 години, откако претходно 4 години се борела со зависности од дрога. Џулиет си го одзела животот само 3 дена пред Џесика да дипломира.

Таа ретко говори за периодот од сопственото детство, но во една прилика откри повеќе детали за најтешкиот период во нејзиниот живот:

„Пораснав со самохрана мајка која работеше напорно за да ни донесе храна. Немавме пари. Голем број ноќи си легнувавме гладни и навистина беше тешко. Нештата воопшто не беа лесни додека растев“.

Во интервју за The Times Џесика откри дека нештата биле толку многу тешки што мајка ѝ морала да краде храна од маркетите за да ги прехрани. Сепак, тоа не ја спречило да заврши на престижната академија Џулијард со што ја започнала својата актерска кариера. Таа паралелно студирала и работела со цел да го заврши образованието.

Иако имала тежок почеток во животот, среќата на Џесика ѝ се насмевнала. Успеала да изгради успешна филмска и театарска кариера, а денес има и титула „војвотка“, затоа што е омажена за Џан Лука Паси Де Препулосо, кој потекнува од благородничко семејство во Италија.

Тие се запознале на модно шоу во Париз, а Џесика откри дека воопшто не сакала да стапи во брак со него, затоа што не верувала во брак. Со, текот на времето станала поотворена за идејата да стават потпис пред матичар и во 2017-та година имале интимна церемонија.

Во 2018-та година преку сургат мајка тие ја добија ќерката Џулиета, која го носи името на трагично починатата сестра на Џесика. Има шпекулации дека парот добил уште едно дете во меѓувреме, но актерката рече дека не сака премногу да говори за сопствениот приватен живот.

Б. С. Б. | Црнобело