Разликата помеѓу спиналната и епидуралната анестезија: Како се нанесуваат и кои се можните компликации од нив?

За да бидете подготвени за сите можни опции за време на породувањето, добро е на време да се вооружите со сите потребни информации. Дознајте која е разликата помеѓу спиналната и епидуралната анестезија...

Без оглед дали планирате да користите анестезија за време на породувањето или веќе сте одлучиле дека сакате целосно природно да се породите, без анестезија, секогаш е добро да знаете како функционираат епидуралната и спиналната анестезија.

Ова е неопходно од две причини: прво, секогаш постои можност да се премислите откако ќе започне породувањето и второ - во случај на итен царски рез, неопходна е анестезија.

Првото и најважно прашање е дали трудницата сака да спие за време на царскиот рез или не.

Предностите да се биде буден се тоа што таа ќе го види бебето веднаш по раѓањето, но и ќе слуша сѐ што се случува во операционата сала, а тоа за многумина е застрашувачко.

Како функционираат епидуралната и спиналната анестезија?

Епидуралната и спиналната анестезија директно го блокираат преносот на сигналите преку нервните влакна во самиот 'рбет или во близина на 'рбетниот мозок. Како резултат на тоа, доаѓа до губење на чувството во тој дел, вклучувајќи го и чувството на болка, па затоа се користат при породување и царски рез.

И епидуралната и спиналната анестезија се нанесуваат со игла во долниот дел на грбот.

Сепак, овие два типа на анестезија имаат клучни разлики поради што различно се применуваат во зависност од начинот на породување, што ќе го објасниме подетално подолу.

  

Спинална анестезија

Оваа анестезија најчесто се користи за царски рез или во случај кога породувањето напредува со голема брзина и кога постои основано сомнение дека епидуралната нема да делува на време.

Спиналните игли се многу потенки од епидуралните игли, а дозите што се користат се помали од оние што се користат за епидурални.

За разлика од епидуралната, спиналната анестезија се дава еднаш, а нејзиниот ефект е ограничен (до 2 часа), поради што во некои случаи се дава во комбинација со епидурална.

Епидурална анестезија

Епидуралната анестезија вклучува инјектирање на лекот во „епидуралниот простор“. Со овој тип на анестезија, пред да се извлече иглата, се поставува катетер преку кој се инјектира анестетикот. Катетерот е поставен надвор од обвивката исполнета со течност, веднаш до нервите кои ја пренесуваат болката од матката.

Поставувањето на катетерот овозможува континуиран проток на лековите против болки во текот на породувањето, како и можност за додавање стимуланси и анестетици доколку е потребно.

Бидејќи лекот треба да помине низ мембраната (дура матер) што го опкружува 'рбетниот мозок пред да стигне до целните нерви, обично се потребни околу 20 минути пред да се почувствува ефектот на анестетикот. 

Основни разлики помеѓу епидурална и спинална анестезија

Главната разлика во споредба со епидуралната анестезија е тоа што спиналната анестезија се применува само еднаш и се инјектира директно во течноста во 'рбетниот мозок, додека епидуралната се применува надвор од обвивката и може да се дава и дозира континуирано.

Исто така, спиналната анестезија делува брзо, поради што е најчест избор во случај на итен царски рез, додека на епидуралната анестезија ѝ требаат околу 20 минути.

Кога станува збор за дозата, спиналната значи посилен ефект со помали дози, додека епидуралната бара повисоки концентрации на анестетик.

Дали боли епидуралната анестезија?

При вбризгувањето на епидуралната анестезија се чувствува непријатност односно болка како и при вбризгување на која било  друга инјекција.

Убодот ќе го чувствувате сè додека самата анестезија не почне да делува, односно по околу 20 минути. 

Како изгледа породувањето со епидурална?

Како точно ќе функционира епидуралната анестезија и како ќе изгледа породувањето за секоја жена може да варира од случај до случај. Она што дефинитивно е факт е дека епидуралот нема целосно да ги згасне сите сензации, но општата цел на давањето епидурална анестезија е да се намали количината на болка што жената ја чувствува за време на породувањето.

Она што повеќето жени кои се породиле со епидурал го кажуваат е дека чувствуваат притисок, како и непријатност за време на траењето на контракциите.

Некои жени можат да препознаат кога бебето е подготвено да излезе и е време за последните контракции, додека на други треба да им биде укажано од лекар или бабица.

Сепак, добро е да се почувствуваат контракции, макар и само во форма на затегнување во пределот на стомакот.

Покрај болните сензации поврзани со породувањето, епидуралот влијае и на други сензации во тој дел од телото, па постои можност жената да не го забележи нагонот за мокрење. Поради оваа причина, на жените им се става катетер кој се отстранува непосредно пред породувањето.

Во одредени ситуации, кога дејството на анестезијата е продолжено, по породувањето се поставува втор катетер, кој се отстранува по 24 часа.

 

Во кои ситуации не се препорачува епидурална анестезија?

Иако анестезијата е сосема безбедна за повеќето идни мајки, има мал процент на жени за кои оваа процедура може да биде ризична. Во овој процент спаѓаат трудниците кои имаат проблеми со коагулацијата на крвта.

Исто така, епидурална анестезија не се препорачува за родилки кои реагираат на локален анестетик или имаат одредени видови на дерматолошка инфекција во областа каде што треба да се стави иглата. Контраиндикација се и сериозните повреди на 'рбетниот столб.

Постои ли можност епидуралната или спиналната да не функционираат?

Ова е можно, но во ретки случаи и кога станува збор за епидурална анестезија.

Неможноста епидуралната анестезија да не функционира може да потекнува од неколку причини: во случај кога катетерот не е правилно поставен, во случај на проблематична анатомија на пациентот и во случај кога епидуралот не бил даден на време.

Дали има несакани ефекти по епидурална и спинална?

Најчести несакани ефекти по употреба на епидурална или спинална анестезија при породување се: главоболка, болки во грбот и одредени невролошки симптоми.

И додека е докажано дека главоболката може да биде директен симптом и компликација предизвикана од блокадата на епидуралниот нерв, не постои научна основа дека болките во грбот и невролошките компликации се несакани ефекти на спинална или епидурална анестезија, туку тие се припишуваат на самото породување, бидејќи тие се подеднакво чести и во случаи на породување без употреба на анестетици.

Кога донесувате одлука да користите анестезија за време на породувањето, треба да имате на ум дека сите потенцијални несакани ефекти се навистина ретки и се рутински процедури со кои медицинскиот персонал се среќава секој ден.

За сите прашања и сомнежи кои ги имате, најдобро е да разговарате со вашиот лекар или анестезиолог, а исто така се препорачува да размислите за други начини за контрола на болката за време на породувањето, како на пример, техники на дишење и вежби за релаксација.

С. Ш. | Црнобело / фото: freepik.com