Разбиваме митови: Невестата не треба да носи бисери на свадбата, затоа што ќе ѝ донесат солзи

Некои веруваат дека колку бисери има на ѓерданот, толку години ќе поминете несреќни во бракот. Дали ова тврдење е само мит, или има и вистина во него?

Иако бисерите се сметаат за симбол за елеганција и често се едно од омилените парчиња накит, кај нас, а и во многу други држави во светот, постои верување дека невестата не треба да носи бисери.

Зошто? Затоа што бисерите се симбол за солзи, а ако жената ги носи на себе на денот на свадбата, тоа значи дека бракот ќе ѝ помине во солзи и несреќа.

Некои одат уште подалеку, па тврдат дека бројот на бисери на ѓерданот го симболизира бројот на несреќните години во бракот.

Најчесто се смета дека белите бисери треба да се избегнуваат затоа што носат солзи, а темните бисери, пак, се симбол за мрачните и темни години поминати во бракот.

Исто така, постои верување дека бисерите не треба да се даваат како подарок, затоа што на тој начин повикувате несреќа во животот на личноста на која ѝ ги подарувате.

Дали ова е вистина, или само мит?

Како што рековме претходно, станува збор за суеверие, па вашиот избор на накит, пред сѐ, ќе зависи од тоа колку сте суеверни.

Логичното објаснување зад ова суеверие е дека тоа почнало да се шири како приказна за да ги обесхрабри девојките да бараат ваков накит за свадбата.

Треба да се земе предвид дека бисерите во минатото биле многу скапи, тешко се наоѓале, а често можело да се случи бисерниот ѓердан да се скине за време на свадбата, па невестата и блиските да почнат да „леат“ солзи заради скинатиот накит и загубените бисери (кои биле многу скапи).

Во минатото, бисерите биле симбол на престиж, дамите ги носеле многу ретко, а најчесто ги чувале само за посебни пригоди во нивните кутии за накит.

Така што, пред да почнете да верувате во суеверија, бидете сигурни дека сте го нашле вистинскиот партнер за вас, па тоа дали носите или не носите бисери на свадбата, воопшто нема да биде важно.

Б. С. Б. | Црнобело